إنت م الآخر حبيبتي بقلم/ نصر سرحان طاحون
إنت خضرة في وسط نيل
وانت حلم ومستحيل
وانت مهما الضلمة غطت
انت فجر لليل طويل
إنت دفة للسفينة
وانت دمعة في عين حزينة
وانت ضحكة لطفل قرر
يرسم البسمه ف عنينا
إنت داري وانت حضني
وانت صاحبي وأخويا وابني
وانت فرحة في ماتش كورة
حالة حلوة وشوق غالبني
إنت طير طاير بعيد
مش أكيد هايكون سعيد
بس حبه ليكي أكبر
والبعاد خلّاه يزيد
إنت شمس نهار أغسطس
وانت زحمة وفيها بأفطس
وانت تلج ف ليل يناير
في الهدوم خلّانا نغطس
إنت أهلي والزمالك
والخطيب وصلاح ولادك
وابراهيم وحسام تواءم
كانوا حلم لجيل شبابك
إنت شوقي وإبراهيم
والبارودي والحكيم
كل حاجة فيكي غنوة
واسألوا سومة وحليم
إنت لوحة ومش فاهمها
إنت سكة وفين آخرها؟؟
وانت موجة ف بحر عالي
نفسي فيها ومش طايلها
إنت خلطة وخلطبيطة
وانت زيطة وزومبليطة
إنت شيء دايما وعكسه
مش بيظهر ف الخريطة
إنت. أملي وانت حيرتي
وانت أمي وانت بنتي
وانت قصة عشق دايمة
إنت م الآخر حبيبتي
التعليقات مغلقة.