إِرسِم، شَخبَط، لوِّن بقلم حبيبة سلام

إِرسِم، شَخبَط، لوِّن بقلم حبيبة سلام

شَخبَط وِلوِّن عَ الورق
اِرسِم رُتوش…

اِرسِم رُتوش لِوشوش بريئة وْطيِّبة
وِعيون مَتِعرَفش اِلخِداع
لوْ ينقطع حبْل اِلوِصال
بِتحاجي عَ الوِدّ اِلقديم
ولا يوم تِبيع

اِرسِم قُلوب…
اِرسِم قلوب خُضر وْبَراح
زيّ اِلْـ فَضا بِتساع كِتير
وِازرَع مَودَّة فْـ قلْبها
تِطرَح محبَّة وِانشِراح

شَكِّل مراكِب مِ الْـ وَرَق
وِافرِد شِراع علىٰ مَتن صاري يكون قَوي
وِارفَع قُلوع ضِد الْـ غَرَق
علىٰ صفحِة النِّيل العظيم

اِرسِم بيوت
شَخبَط مَطارِح
لوِّن شجَر بِالسَّعد طارِح
وِطيور بِتبْدُر في الفضا
قمْح وْسلام

واِرسِم شوارع آمِنة
وِعيال بتِلعب ليل نهار
مِطَّمِّنة
وِعيون توزَّع لِابتِسامْ
مِّش خايفة يسرَق فَرحَها
لِصّ اِلْـ حياة

اِرسِم بنات واِرسِم بنين
شخْبَط قِصص حُب وْحَنين
وإدين بريئَة ومُخلِصة
مِتغمِّسة بـْ عَرَق اِلْـ جبين

اِرسِم مَّدارِس لِلعيال يتعلِّموا
حُبّ اِلوَطن
شَخبَط لهم فنّ اِلتَّعامُل في الحياة
واِرسِم مِياة
وِبَلاش تعكَّر صَفوَها
لوِّن حياة
وِاهْديها لِلنّاس كُلّها

اِفتَح بيبان تِوْهِب أمل
شَخبَط أماكِن للعمل
وزَّع سعادة عالْبيبان مالهاش حُدود
وِاوْعاك تُعود
وِتسيب مكان في الأرض بُور
إوْعاك تُعود
مِن غير ما تِملا الْـ أرض نور
وِيدور علىٰ الدُّنيا السَّلامْ!!