ابو قلب مريض بقلم شيماء عادل
وأنا لسه بدور على بكره
رجعولي الناس بتوع امبارح
جايين ماسكين قال ف الذكري
طالبين م القلب انه يسامح
طب مين ل دموعنا رسم منديل
يمسح لو كدب دموع الليل
ويطبطب ع الاوجاع بضمير
مع أول هزه ريح سابوا
حطوا المسافات وسنين غابوا
بعد اما بنينا الصبر بيوت
ورسمنا خيوط لسنين م الفرح
جايين عايزين م الماضي ساعات
فاكرين الدنيا هتديهم
واننا ما نصدق نلقاهم
نكسر علشان عينهم مسافات
ياما خطي القلب كتير ع النار
صحبتكوا مرار بتزيد اوجاع
البيعة إللي اتباعت في مزاد
مش سهل تكون في ايديك تاني
وبلاش ترجع تبكيلنا دموع
وتكون مجني عليه مش جاني
حواديتك مش هتبل لي ريق
ولا عمرك تبقي صديق في طريق
ولا مره لقلبي تكون غالي
دي عنيا خلاص ما بقتش تشوفك غير كداب
لو ألف عتاب
مش هترجع ميه لمجاريها
ولا دنيا هتقدر تماشيها
يا ابو قلب مريض
هتلف تلف وترجع مستني اسامحك
ما أنا دايما بستحمل جرحك
لكن أنت مريض
بتساوم قلبي علي غلاوتك
وفاكر هتدوم
كات دامت للاموات قبليك
اه والله نسيت
انك ميت ضمن الاموات
والميت لو يرجع تاني
في قيامة تقوم
التعليقات مغلقة.