اتعلم شعر.. رضا أبو الغيط
اتعلم
تشكر وتقدر نعم الرحمن
وبلاش تضايق لو ضاقت
أو حالك هان
واتعلم ترضى بنصيبك
وتسيبك من كنا وكان
وبلاش نكران
اتعلم
تشكر وتقدر نعم الرحمن
وبلاش تتعصب ع الدنيا
وتنام زعلان
يكفيك م الدنيا انك ماشي
زي الرهوان
وولادك جنبك
بتشيلك
ساعة الفيضان
وان كان ع اللقمة
هتلقاها
والهدمة هتسكن جواها
والمية هتملى الخزان
يكفيك م الدنيا انك عايش
بين أحلى جيران
وحيطان بتحس بأوجاعك
لو قلت الآه
وبتسند كتفك ودراعك
لو أملك تاه
اتعلم تصبر ع الدنيا
وتكون أيوب
ده التوب الدايب فوق جسمك
افضل ما تكون عايش وحدك
ف الريح عريان
واللقمة الحاف اللي ف ايدك
أفضل ما تكون عايش تايه
مش لاقي أمان
اتعلم تصبر ع الدنيا
واستحمل طعم الاحزان
وبلاش تستلم لظروفك
وتطاوع فكر الشيطان
ومسير الفرح اللي مخاصمك
يطرح لك .. ورد ورومان
ومسير الشمس اللي اتكسفت
تفتح لك شباكها زمان
تفتح لك بابها وشباكها
وتصحي فيك الإنسان
التعليقات مغلقة.