احنا امة عجيبة بقلم يحيى أبو السعود
احنا امة عجيبة
غنم علي بقر
جوانا طيبة
و قلوبنا حجر
في الصبح نصلي الفرض
و الضهر نحارب بعض
نهتك لحمنا و نكسر عضمنا
و نعمل اننا بنغير ع العرض
امة جهولة
بتدعى البطولة
و عايشة علي كان و كان
و معارك جدودنا الاولى
فينا كام مسيلمة
بيدعى الصلاح و النبوة
و ناس قلوبها معتمة
خربانة من جوة
و فينا كم يزيد
لم يرحم بيت النبوة
احنا امة متنفسنة
و في العبط مين زينا
واخدين بطولة في الكلام
و الشعارات و الغنا
كان فينا زمان عنترة
فارس يشق الورى
و اجعص ما فيكم الوقت
في الحرب ما يسوى مرا
احنا امة بتحب السهل
بنمشي تاتا علي مهل
و عاملين كلنا علما
و اجعص ما فينا ابو جهل
التعليقات مغلقة.