احنا بينّا …
بقلم حسن أبو عرب
إحنا بينّا
حاجات كتيرة
بينا حُب وبينا عِشْرَة
وبينا غِيرَة
غِيرَة مِن نسمة تِطُولِك
مِن عَزُولِك .. من فِلُولِك
دُولَا ناس .. أصلاً حقيرة
يامَا مديتلِك جُسُور
ياما رمِمت الكسور
كنت ليكى أسد جَسُور
وانتِ مُلهِمتى الأميرة
يا اللى معرفتِش سواكى
كُنت بشتاقلِك معاكى
كنت طير عاشق سماكى
وفى هواكِى الروح أسيرَة
لِسه بينا الوِد باقى
لسه بحلَم بالتلاقِى
لسه بتدُور السواقى
يا اللى فاقدين البصيرَة
حُبى ليها حاجه تانية
عِشق بيزيد كل ثانية
عِشق يِملَا الكون يادنيا
عِشق مصري..
عشق أصلي ..
لا هُو قِشرةْ
ولَّاهُو عِيرَةْ
زغرطوا .. دقُوا الطبُول
واغزِلُوا م الصَبر نُول
نَادُوا ع الطاهره البتُول
واحصدوا الفرحه الكبيرة
لجلَهَا بدعِى ف صلاتِى
واوهِب العُمر اللى آتى
واعزِف النصر بنَايَاتِى
لجل تِكمَل دى المسِيرَة
دا احنا بينا حاجات كتيرة
حسن أبو عرب.
Hasan Abo Arab
التعليقات مغلقة.