ادخل جواك …شعر وحيد الجمال
من غير ما تصاحب حد معاك
ولا حتى تلاحظ في غيابك
خلية من جملة أسرارك
وانسى المسافات اللي مابينكم
علشان تطمن لوجودك
وتشيل في حواجزك وسدودك
كراكيب هتقفل في دروبك
وتزيد في صعوبة خطاويك
اوعد نفسك والعهد شريف
راح تحفظ كل اللي تشوفه
اصل الموضوع اكبر بكتير
من كونك داخل تتفرج
على ذنب كبير انت مخبيه
داخل روحك
هتحل في اصعب لغة رتمات
والمنفي في زمن المستحيلات
راح يرجع يسكن في ضميرك
جايز توصل !
ممكن تفشل !
لكن صدقني …
هتلاقى حاجات خباها الوقت
في سراديبك
هتكدب وتصدق نفسك
و هتلعن صمتك و مبادئك
يمكن تستغرب كدا روحك
وتفتح وجعك في جروحك
و غيابك يمكن يتجدد
من غير ما تفكر وتحدد
ازي راح توصل وتواصل
مسافات العمر المتكسر
انا عارف يمكن هتفسر
ازاي عن ذنبك هتكفر
تتلوى وتضرب في كفوفك
انا بيني وبينك متوتر
مش عارف حتي اني افكر
ان كنت أنا صادق في نصيحتي
ولا التجربة هتنجحني !
او هي بذاتها تدمرني !
ود حجر الزاوية اللي فاضلي
انا خايف لحظة ماتشوفني
وأبان عريان جوه حقيقتي
وخطاوي الناس دي تجيب سيرتي
يمكن تغفر يمكن تبكي
أو تلعن حتى في تواريخي
كمل في طريقك ماتخفشي
انا قادر أواجه اخطائي
والسكة اللي تخونك سبها
لو مين هيساومك.. بدلها
طفي الانوار جواك واهرب
من غير ما تطلع صوت يصرخ
ويلم الشمس في أحضانك
اوتار العود رفضاك تعزف
اخر مكتوب لسه بينزف
على كف ايديك
الضلمة هترسم وتشطب
هتضيق حواليك وتبدل فيك
وتقلب في حيطان الصورة
و ازاز الروح المكسورة
لو شوفت العالم حواليك
اتكركب كله في بعضيه
من جانبه ل فوقه ل تحتية
مدد واتمطع في براحك
خد نفسك غمض في عينيك
لك رب مدبر يحميك
من قلب الشدة ينجيك
التعليقات مغلقة.