ازي اطلع ولادي حنينين وبارين بيا…..
بقلم سعاد محمد
اولا .هنعتبر قلوبهم دي البنوك اللي لازم نحوش فيها كل المشاعر عشان اما يكبروا يلاقوا جواهم اللي يدهولنا بمعني هنحب وهندلع وهنلعب معاهم وهنصاحب بكل ما فينا من قوه ونعبر ونقول كلام حلو كل ده من رصيدنا ناخد بالنا وكل ده بيتحوشلنا جواهم …
ثانيا . بنكون حازمين معاهم الثواب ثواب والعقاب عقاب ومنرجعش في كلامنا وده ليهم اولا وده اللي هيخليهم يحترمونا ويعملوا لزعلنا قيمه ويخافوا نزعل مش يخافوا مننا …
ثالثا . بتكون كلمه الام والاب واحده عشان نفسيه الاطفال انها تفضل سليمه وميفقدوش الثقه فينا ولا يطلعوا بأي عقد نتيجه لاي صدام بينا ولا يستضعفونا ونحطم جواهم معني القدوه …
وعاوزه انبه اي ام لو حصل خلاف بينك وبين الاب البيت ملوش اي علاقه خلافاتكم في اوضه نومكم الاكل يتعمل في معاده مفيش حاجه اسمها اعاقب ومطبخش دي واجبات الولاد المفروض ميحسوش اصلا باي حاجه بينك وبين الاب وزي ماهوه بيصرف في البيت عادي البيت ملوش علاقه يفضل ماشي زي الساعه عشان الاطفال متحسش ويفضل تتكلموا عادي ادامهم واما يتقفل عليكم باب تقدروا متتكلموش عادي او تتعاتبوا براحتكم بس المهم الاطفال متتأثرش…
رابعا .الطفل اول ما بيبدا يفهم مش مهم خالص من سن كام بنعلم ياكل لوحده ويشرب لوحده ويلم لعبه لوحده ويغير لوحده وادام شويه نقعد ادامه نعلمه يستحمي لوحده وبعدين يجهز شنطه المدرسه وهدومه لوحده كل دي اعباء لو خفت من عليكي هيبقي عندك طاقه حب اكبر تديهاله وتبدائي تفضي دماغك للصداقه عشان تعرفي تصاحبيه بدون عصبيه وهوه بينفع نفسه وادام شويه بتبدائي كمان تحمليه مسؤليه البيت معاكي نظافه اوضته ترتيب دولابه وهدومه وقفه في المطبخ معاكي سواء ولد او بنت مش بتفرق خالص لازم يطلعوا حنينين وحاسين بينا وهيبقوا حابين ده لو اخدناها بالتدريج كده وبقي ده مش عقاب لاء بحب ومن باب المشاركه تعالوا نعمل كذا سوي ونرغي ونهزر ونرتب الاوضه ونحدف المخدات ونحكي يومنا كان عامل ازاي واحنا بنشتغل لازم احنا كمان نعرف ازاي نستمتع بأمومتنا متبقاش مجرد طوق خانقنا في رقابتنا….
خامسا . ناخد رايهم في كل كبيره وصغيره ومن بدري عشان يبقي عندهم راي وذوق ويديهم ثقه في نفسهم ونشجعهم ونحفزهم ونشكر في ارائهم ونديهم المساحه الكافيه للحوار والرغي ونصلحلهم افكارهم ونوجهم ومننهرهمش ولا نشخط فيهم مهما عملوا حتي من مصايب لازم نلاقيلها حل بهدوء عشان لا يخافوا ويخبوا ولا يتعمدوا يكذبوا ونكون بير لاسرارهم مفيش مخلوق يعرف اللي بيحكوه ولا نقول لحد ولا نشتكيهم لحد …
سادسا . بيكبروا وبيبقي عندنا احنا مواعيد دكاتره لينا تفضي نفسك بابا عنده دكتور لازم تكون معاه تنزل تجيب لبابا الدوا حد فيكوا يظبط المنبه لمواعيد الدوا عشان مننساش قومي اعملي لبابا ليمون عشان عنده برد هنروح نزور خالكم عشان تعبان مهم اوي نزرع فيهم كمان صله الرحم ويعرفوا يعني ايه واجب عليهم يراعوا اهلهم جدتك تعبانه تعالي معايا نحميها وتقف معاكي وتحمي جدتها وهكذا ….
الخلاصه … علي اد ما ولادنا بيشوفوا حنيه مننا علي اد ما بيشربرها بس مش حنيه تبوظ لاء حنيه تعلم الصح من الغلط حنيه تملي قلوبهم رحمه بينا وتوجيه وتعليم طول الوقت بالصح والغلط والعيب والحلال والحرام والرأفه ….
وربنا يقدركم يارب وتنولوا برهم دنيا واخره…
التعليقات مغلقة.