اسمك ريان…بقلم محمد سعفان
اسمك ريان
وانت الغرقان ف البير
انت المفحوتلك مليون بير
وانا زيك يا أمير
قدامي النقرة بتندهلي
مفحوتة بايد أهلي
والناس الشقيانة
مش قادرة تشيل مع كتفي
وانا مستكفي
بالهم اللي زرعته ف أحلامي
دلوقت بيطرح قدامي
أوهام مرسومة
والصورة المعلومة
بميت وش
بتسقف وتغش
وتفرق ف أهات
أصل الخال الطيب مات
وكلامنا معجون بسكات
مش قادر ينطق ولايسند علي سور
ولا يفرق بين ضلمة ونور
ولا يرفع مقامات
الواد عاش ف البير مستور
ومعانا طق ومات
التعليقات مغلقة.