اشهد وخلاص … ردا على قصيدةالشاعرة القديرة/عبير عبدالمنعم “اشهد بالحق ” بقلم/ وحيد علي الجمال

اشهد وخلاص … ردا على قصيدةالشاعرة القديرة/عبير عبدالمنعم “اشهد بالحق ” بقلم/ وحيد علي الجمال

اشهد بالحق ..

الصهد بياخد روح الضل
والخل اهو بايع ود الخل
والليل بيأزز في ضلوعنا
وانا بكتب شعر بيحكي الكل
ماهو كل ما اخطي الضلمه
تفور؛
تملالي ماجور الضي بغِل
لو رمش الضحكة بيغمز لي
ينكرني الكل
بالعند في عند اللي ما سمى
على دمع القلب..
في وشوش راح ابيعها ومجانا
الوش بقرش
ياضلام محبوك على وسط النور
خد لك قيراطين قوم يللا وغور
مافيهاش تفاصيل
هربانه الفرحه وف المناديل
مرصوص الدمع
والشوف والحيل دا عديم السمع
أشهد بالحق
الخلق مصاير في الدنيا
والدنيا بحالها مهيش حلوه ف عيون الخلق

عبير ..

الرد …اشهد وخلاص

الصح تقولي اشهد وخلاص
ماهو انت دليلنا على الإخلاص
بتقرري شئ معروف للناس
والحق اذا عندك ضاع يا عبير
بتضيع الجملة من التعبير
ويعيش الحرف في نفسة أسير
الصهد ان كان مطلوق ع الضل
وبيخنق روحه ياخدها بغل
وإذا كان فيه سوق منصوب للذل
أسعار الود هناك بتقل
ازاي هنفسر معني الخل
وازاي نهرب بضلوعنا نفل
والليل بيئز في حضننا أز
وكأن ده تار مكتوب ع الكل
ماهو لازم شعرك يبقى صبور
على سرك يصبر يبقى كتوم
مش لازم أحكي النعمة تزول
خفاش الضلمة تملي يثور
إذا شاف الحق طلع في النور
غربان الزور بتعلي السور
أوجاع الناس عماله بتفور
فيه حق ومنها كمان مأجور
لو سبنا الحق هياكله السووس
والفرح ان جه هيكون منبوذ
وساعات الضحك هيبقى ممل
لو شافك حد وبص عليك
بالعند هينطق فيك ويقل
ويزود كل معاني الغل
من دمع القلب..شربت سكرت
بصيت فلقتني في وسط السرك
و شوشت وشوش مافيهاش ولا عين
من توب النور واخدين قيراطين
مزروعة الضلمة على الجانبين
(هربانة الفرحة وف المناديل )
وكأن الحزن صبح تواشيح
بنرتله قبل الديك ما يصيح
أشهد بالحق والإخلاص
إن انت بجد ياست الناس
أصبحتِ علامة حب الناس
…..وحيد علي الجمال………