اصالحك ليه بقلم أحمد زيدان

اصالحك ليه ؟
و جبلي شفاعه تشفع لك !
هواك غاواك
لسكة بعيده عن دربي …
و مظنش اني هرجعلك
صحيح بهواك …. و بتنفس هوا رمشك
لكني خلاص … اموت مخنوق
ولا اني اعيش يمك
زمان اخلاص … دلوقتي خلاص
بقالك ريش … ترفرف بيه بعيد عني
زمان ما خلاص … أنا هنت عليك
و فيك ازاى يخيب ظني
ليه اتهان … وانا مش غلطان
… تعالي شوف …حطام انسان
ماهوش ندمان …
و محسش حتي بخسارتك
مش مستني منك نبض ولا حتي نفس إنعاش …
ولا مستني فوق الجرح لفة شاش ….
‏ حقيقي شبعت منك غدر …
تعالي و دوق … فاضل لك شوك
م اللي جنيته من غدرك
خسرت كتير …
‏ لكن كسبان …كل دقيقه بقيالي …
أعيش درويش …. في البلاد سواح !
اتسول حروف شفقه … و اتدفي ببرد الليل …
ولا اني اعيش حلمك
ه‍كون جاني
هكون ظالم ….
و كل القسوة ليك وحدك
اصالح روحي لو مرة
دنا من ظلمك اتألمت
اداوى جرحي بجراحك
كتير منك انا اتعلمت
لحظه قبل ما تمشي
و تفارق دروب عشقي
بلاش تستني نور شمسي
ولا تشتاق لصوت ه‍مسي
ولا تنطق حروف اسمي
منيش عاوزك حقيقي كرهت
حقيقي كرهت اكون ضلك
كرهت العوزه لو منك ….
ومن جرمك ومن اثمك
‏و صوتك ف اسطوانه كذب ….
‏ بدندنلك و اغنيلك …
ولما عزفت ب قوة غرقت ….
حقيقي كرهت … تفاصيلك
فهمت الدرس متأخر ….
بقيت تلميذك الشاطر ….
‏خلاص معدش ليك خاطر …
‏لا ماضي ليك ولا حاضر ….
‏في الذكرى اللي منسيه
مضيت توقيع حقيقي ندمت
و جبلي شفاعه تشفع لك !

مظنش اني هرجعلك ؟