اصرخ وقول ياقلم …شعر السيد الشيتى
اصرخ وقول ياقلم
خلى الألم ينزاح
واشطب سنين الندم
اوعى تصحى جراح
موكب نهايته العدم
مين ف الحياه مرتاح
اصحا وصحى الهمم
تلقى الأمل صَدَّاح
صحى ضمير الجشع
للمال خضع وإتباع
عمره ماحس بشبع
لو حتى غيره ضاع
لكن الأصيل لوشِبع
يفضل أصيل لوجاع
ويشيل جبال الألم
يستحمل الأوجاع
اصرخ وقول يازمن
ليه المِحَن سبقاك
نجري وراك من زمن
تاهت قلوبنا معاك
كَحَّلتنا بالأمل
نَسّيتنا نور رؤياك
تسرق ربيع عمرنا
تهادينا بالأشواك
عَجِّزت ليه ياوطن
شكلك بقيت مهموم
نَسّيتنا طعم السكن
دوبتنا ف هموم
عاشقين تراب سكتك
خاصم عنينا النوم
عايشين على محبتك
رشيت طريقنا غيوم
دايماً نلوم ع الزمن
وإحنا علينا اللوم
ياريت يانبض القلم
متكونش يوم مسموم
ولا الضمير ينعدم
مع كل موجه يعوم
ياما نفسى اشوف الوطن
يسمع ندا المظلوم
التعليقات مغلقة.