اضحكى لو حتى كدب…شعر أشرف الشناوي

قصقصى أحلامنا لب
واشنقى فيا الامل
علشان بحب
دوبى فى الشوق وجعنا
ماحنا ياما فى ضحكتك
ياما اتخدعنا
وازرعى جوانا شوك
دوسى عالورد اللى نبت
اللى ولدت عمرها
زى اللى ريت
دوبينا فى مج شايك
واشربى على لحن نايك
اللى فاضل لينا ضحكه
بس شابكه
فى سلك شايك
روقى بس انت بالك
صبحك الناقص وضوء
امتى من حضنك يفوق
يبدر النور فى الغيطان
قبل مايفوت الاوان
مدى ايدك للى تاه
طبطبى دمعه وقساه
يوم ماحبك قالك انتى
قلبى يدبل لو حزنتى
ليه تبيعى العشق تانى
يخدعك صوت الأغانى
ليه تسيبى الحلم يهرب
من ايديكى وف ثوانى
ليه بياخدك ليل وجعنا
لما خوفنا قام بلعنا
كل حاجه بعد منك
باهته من غير اى معنى
اضحكى براحتك وعيشى
قصقصى دايما فى ريشى
واحبسينى لما اقولك
نفسى بس فى يوم اطير
واحبسى قلبى
اللى حبك
لو مفيش عندك
ضمير