اقر واعترف بقلم اشرف الشناوى شاعر عاميه البرامون المنصوره
أقر واعترف
بانى المواطن
قليل الحيله
وان احلامى
كلها مستحيله
وانى بكره
ماليش مكان
فى الهيلمان
وانى صاحب
المولد وغايب
وانى خايب
وانى فرد حمام
مايعرفش غيه
وانى محبوس
فى السكات
وانى طبال
للغازيه
وان انا نيشان
الميدان
صدرى مسرح
للرمايه للروايه
من زمان
وان انجى
ازاى تحب ابن
الجناينى
ابن خدام السرايه
شغل سيما
والسلام
والبطل قبل
النهايه
ينتصر لو بالكلام
أقر واعترف
ان انا طلعت
العبيط
مش حويط
وان الغلت فيكى
بالعبيط
وانى نازل
عالغويط
والهالوك عمال
بيخنق فى الشجر
والمطر
محبوس ورا
باب السما
والصبح فيكى
جرجروه عالمحكمه
من بكاه
صابه العمى
والليل بيرمح
عالشطوط
وبمعلمه
وان فجرك كتفوه
بالمخطمه
أقر واعترف
ان اسمى خيال
مأاااته
وأن ضحكى
مش شماته
وانى عاشق
باستماته
وانى روحى
دايبه فيكى سنين
عباده
واسالى عنى
البياده
واما يعنى
تشاورى ليا
ببقى فى غاية
السعاده
أقر واعترف
انى جاهز
رغم موتى للشهاده
انى جاهز
رغم موتى للشهاده. ………….
التعليقات مغلقة.