الأَصيلْ أَصيلْ …
حبيبة سلام
الأَصيلْ أَصيلْ __
كُنت فاكْرَة انّ
القُلوب البيضا لِسّه هيَّ هيَّ
وانّ اِلنُّفوس.. نَفس النُّفوس
صافيَة وْنَقيَّة
مكُنْتِش اعرَف اِنّ الزَّمَن كشّافْ
واخاف اَحكُم.. أظلِم بسوء ظنِّي
وِكان ظَنِّي كُل البَشَر أَخْيار
بَسّ اِكْتَشَفْت اِنّ الزَّمن دَوّار
وِانّ الوشوش كَما الأيّام
بتِتْغيَّر
بَسّ اِللّي بيْحيَّر..
ليه النّفوس مَبَقِتْش زَيّ زمان؟!
وِازّاي صَبَح قلب البَشَر صَوّان ؟!
زي الحَجَر مِ القَسْوَة.. مِشْ بِيْلينْ!
وِانقَلبِت اِلمَوازينْ…
قالوا عَنْ سَواد اِلْـ قَلب حِنيَّة وْ
مات اِلضَّمير وِالدَّم بقى مَيّه
وِحاجات كِتيرَة زمانْ كانِت بتِجمَعنا
اِتغيَّرِتْ وِالْحال أصبَح بِلا مَعنى
فاشْمِعنى ناسْ باقْيَة عَ الْعَهْد والعِشْرَة؟!
دِي الْفِكْرَة مِشَ في الزَّمَنْ..
اِلفِكْرَة في الْإنسانْ
واِنّ طيبْة القلْب نِعمَة تْصون صاحِبها
وِالْكلام اِلحِلْو يعمِل في النّفوس اِلمُستَحيلْ
وِانّ الأصيلْ
مَهْما طال اِلعُمْر
بَرضو يْعيشْ أصيلْ
وِيْموت أصيلْ!!
حبيبة سلام
التعليقات مغلقة.