الإنتظار
ايسم فياله
………
الليل مخيف ..
فارد جناحه ع المدى
بيرش مر الإنتصار
وغيامه من كُتر الألم
بتنز دمع الإنكسار
وحاجات كتير متجمّعه
فرفطها طعم الإنهيار
يا سنين تقيله بالعلل
مغصوب حنين الإنتظار
والحلم لمّا في لحظه دار
ما لقاش سفينه للطوفان
ولا شاف جبل
الحلم بالأحزان حَبَل
بس الولاده اتعثّرت
من فعل قهر المحتمل
لحظة ما صوت الأه فلت
وما بين سطور المستحيل
كل الحروف اتبعترت
وامّا الحقيقه اتبدّلت
الصوت ما عادش طالعله صوت
حتى الوعود ..
صبحت وعود متهلهله
يظهر عويصه المسأله
وما فيش حلول
صوت الوجع جوّه القلوب
يشبه كتير دق الطبول
وكأنها حرب احتلال
راجعالنا من عصر المغول
والليل في شكل الضلمه غول
أنيابه تشبه للرماح
مين اللي يقدر ع الهرب
وما عادش للمهرب براح
أحلام بتولد قيصري
وكأنها بتولد سِفاح
يطلع كابوس يمنع صباح
ويزيد في لون الليل سواد
تتحوّل الأوجاع رصيف
تسند عليه المعطيات
وقبور كتيره بتتفتح
علشان تساع الأمنيات
وفي عتمة الليل الكئيب
موؤوده ضحكات البنات
مدبوحه أحلام الولاد
وحاجات بتنشع بالمرار
وانا لسّه قاعد في انتظار
ضي النهار يحدفلي ضوء
مستني ترجع تبتسم
شمسي المهاجره في الشروق
فاتح ممر الحب شوق
ومخبّي في الشريان أمل
شكل الضلام لمّا اكتمل
عرّفني إن الجي نور
ما حاولتش ابني أي سور
بين الحقيقه والخيال
قلبي اللي بيحب الجمال
واثق بإن الضي جي
ومادام في قلبي النبض حي
ح افضل على طرف الطريق
باصص على …
أخر حدود الأمنيات
…………………………..
ايسم فياله
التعليقات مغلقة.