البطة السودة…شعر رضا علي أحمد ابو شنب
انا واحد مصري واسمي عويس
من شكلي تحس باني تعيس
معجون من مية ومن طينه
ولاعمري في يوم هصبح ابليس
انا مصري من عين الصيرة
وابويا مهاجر من بلبيس
ومعلم على وشي حصيرة
مكتوبة باسمي لاني وريث
وبحط دماغي على الطوبة
والطوبة التانية معايا ونيس
ولا بحسب ايامي السودة
ولا عايز يجي عليا خميس
ولا اشوف الليلة الموعودة
ولا حتى يقولوا عليا عريس
مكتوبلي اكون ابن العوزة
واضيق لبسي من التخسيس
ولا عمري في يوم روحت الروضه
ولا بكتب اسمي على الكراريس
ولا مرة لبست على الموضة
أو مرة ركبت في يوم اتوبيس
كان حلمي يكونلي ولو اوضه
لو حتي انام جنب البلاليص
واهجم بايديا على الموزة
وبلاقي الحلم يجيب كوابيس
بيجيبني الحلم ماسك جوزة
أو مرة يجيني ماسكني بوليس
أو دايما بشرب في البوظه
ما هو أصل الحلم بيجي خبيث
انا حلمي خلاص جابلي حموضه
خلاني بنادي واقول يا مغيث
من أمتي ابن البطة السودة
هيعيش الحلم معاه ويهيص
من أمتي ابن البطة السودة
هيعيش الحلم معاه ويهيص
التعليقات مغلقة.