التعويذه.بقلم.وحيد على الجمال

اللى ما قلتوش.انا مافهمتوش
ولا عمري انا هقدر استنتج
وأكمل معني ماحستهوش
مطلوب تتكي على كلامك
ماتحطيش تعبك ومرارك
وتعيدي الكلمة ثلاث مرات
علشان استوعب احساسك
واغير مودي اللي تحول
من شكل ملامح تكشيرتك
من كلمة بتطلع بالعافيه
من غير حسابات
وكأن صابحنا بيتكفي
مش قادر يوزن في الكفة
ويردد جملة ثلاث كلمات
انا شايل دفتر للذكرى
متسجل فيه حبة سلامات
ومعاهم كام احساس بايت
ووعود تتعبى في شكاير
على انك تفضل في حياتي
ولا احلى ملاك
بترفرف جوه في احلامي
من غير جناحات
بتعافر يفضل كدا بينا
حب الروايات
قبل مايتبعتر في الزحمة
ويطلع خيالات
وصباح الخير عمرها ماتقول
ازي الدمع في عيني كتوم
تضحك وجروحها تملي تزوم
في القلب غيوم وكلام مسموم
مع كسرت روح قررت الصوم
مش عارف أفسر أسبابه
ولا حتي اسجل في بنوده
لكن مهموم وساعات مغموم
كان يتهيالي انك فاهم ايه المقصود
من غير ماافتحلك بقى روحي
من نظره عين بتعدي تفوت
تبقى في ملكوت ما يفسرهاش
غير التعويذه المكتوبه بينا
في قاموس
انا ما اخترتش افضل في مدينتك
مستني اخر تأشيرة لإقامتي
وشهادة تقول إننا مسجون
داخل قضبان ذاتي ونفسي
من غير تصريح يثبت حقي
مش لازم تسكن أوردتي
أو حتي تكون داخل نبضي
ولا عمر الناقص جوايا
يكمل من غير مااثبت حقي
إن وجودك داخل دمي
هو دليلي وسر برائتي
مابقاش فيه صعب ف أسئلتي
وفشلت في مجموع يسمحلي
ادخل في قصايدك وديوانك
أو حتى أمر في احلامك