التغيير مطلوب
بـقلم أسـمـاء الـبـيـطـار
لما كنت بره مصر كنا قاعدين في كمبوند للأطباء كانت العمارات شبه بعض نفس اللون و المساحة و الحجم و التقسيم من الخارج و الداخل
لما كنت بروح ازور حد كان إبني يصرخ مش عاوز يدخل
بيحسبني رجعته للبيت تاني أحاول اقنع فيه رافض يدخل البيت و مش بيطمن إلا لما يلاقي الباب اتفتح و شاف وشوش غير اللي متعود عليها
كانت جارتي العراقية تقعد تضحك عليه و تقولي عنده حق إحنا نفسنا حاسين بملل .
و بعد فترة خرجنا من الكمبوند ده و قعدنا في فيلا كبيرة و أوسع و مختلفة تماماً عن المكان اللي كنا فيه
أنا نفسي قولت لزوجي إحنا كنا قاعدين هناك ازاي
المكان أوسع في كل حاجة و أماكن للزرع أجمل و أكبر .
كتير مننا بيخاف من التغيير
بيخاف إنه يطلع من القالب الروتيني اللي اتوجد فيه
بيخاف حتى يغيبر أماكن عفش الشقة
بيخاف يغير استايل لبسه
نخاف من حاجات كتير و في النهاية بنحس بملل في كل أمور حياتنا شايفين الدُنيا ماشيه على سطر واحد .
و الله وصلت بناس إنها بتخاف تسافر تفرج عن نفسها يومين تقولك لا أحسن يحصل حاجة ؟!
ربنا خلق الدُنيا ألوان بحر و سما و شجر و حجر كل حاجة ليها لونها
و ليها جمالها .
و النفس علشان تعيش بسلام و راحة لازم من وقت للتاني تغير
تغير حتى أماكن الأشياء في البيت
تغير لون باب الشقة
طرحة جديدة
أو كرافته
المهم يبقى ديماً في تجدد في حياتنا ما دُمنا بين الأحياء نسعى .
التعليقات مغلقة.