التهمة ..فقير …
فايزة الميانى شهرزاد
يا وجع القلب المتكدس طوابير طوابير
من جوا الجرح المتغرز من غير تخدير
واخدانا التوهة و بنعدي من غير تفكير
أيامنا الحلوة دي معدودة
و النيلة كتير
و الكف الحاني مجبولة
على طبع الخير
تحلف تتقطع ما هترجع
من ظلم الغير
و في وقت الشدة بتتوجع
و القلب أسير
متغمي بحبه و أشواقه
غنوة مزامير
دي مراية و عمية يا ود عمي
مليانة تكسير
ماتشوف الوحشة و بتعدي
و تخاف و تغير
و تسامح … و ف سوق القسوة
دلالها أمير
مليانة دموع متخبية
و السر في بير
و لا ليها ” عزيز ” مرة يعدي
و لا فيش تغيير
من جرح لجرح و من ضلمة
ضيعنا كتير
و الباقي من العمر اتبدد
في طريق محاذير
و الخوف نسانا اللي كوانا
و نقول مقادير
و قميص ال ” يوسف “
ما بيرجع
و الرؤية عصية على الحكمة
و لا فيش تفسير
و سنين القسوة بتمدد
و الليل ملضوم بجدايل تيل
و الصبر حباله بقت تشنق
و التهمة فقير !
التعليقات مغلقة.