الجــــــــلابـيه…بقلم معوض حلمي شاعر عامية
رجلين غلابه مشققين
ماشيين على السكه اللي شاهده
ع التاريخ في غيطان بلدنا
من يوم ميلادنا ونهر النيل بيفيض
ويجود بطميه ع الجسور
فلاح جاسور
بيزرع شطوط الارض بالبامية النديه
والنيه طارحه عيدان عفيه ،
وسنبلات مليانه خير
عنده الضمير في الفاس
تبوس في خد الأرض تتعايق صبيه
لابس يادوب كلسون قديم ،
وسديري فوقه الجلابيه
لساه بيربي في الرجال ،
وبنات تشيل المسؤليه
لساه في وقت السلم بنا ،
لساه على الدفه زناتي
سارح يوماتي لزعته ،
والصره فيها العيش مقدد
وينام يمدد ع الحصيره
وقلبه خالي م الأذيه
طب ذنبه إيه ،
في زمان برغم النور ماليه
كارهينه ليه أهل المدينه البراويه
ناس الحضاره والثقافه
والرياضه والنوادي اللولبيه
مانعينه ليه بقرار غبي ..
خلانا عبد وسيد
يدخل نوادي السادة وقصور الثقافه
ويبقى واحد م العبيد
وازاي ياسيد الناس
يالابس بدلتك من زرع إيده
تهين كرامه أعزها رب العباد
من يوم ميلاد الإنسانيه
وانت اللي عايش في المدن
والزحمة والريحه الكريهه
وريفنا مافيهوش اقنعه
ولافيه شطط وحاجات سفيهه
وواخدنا ليه لعصور وفكر الجاهليه
فلاح بهيه ياعمنا عاشق بهيه
له طله أجمل م الورود حلوه وبهيه
عاشق سماها وارضها
والتوته والساقيه العفيه
والجلابيه ف شرعنا نخوه وقيم
ع السكه ماشيه بعزها ترعى الغنم
وتخلي ارض البور عمار تطرح نعم
وانت الصنم كـاره لريحة طـهرها
الجلابيه ف عزمنا عرض البلد
ميراث جدودي وعلموني أكون وتد
وارفع عمد على أرضها
وادفع حياتي مهرها
فلاح وواقف ع الحدود زي الأسد
الجلابيه أبويا وامي
وكل غالي لبسها قبلي واندفن
فيها الدفا ، وسنين وفا ،
وجيوبها خاليه من العفن
على جسمي نسمه حنينه
ويمد خيط النور مداه
وهاوصي بيها في الحياه ،
تكونلي في الأخرة كفن
بقلمي الفلاح الفصيح معوض حلمي علي
منشأة بطـاش / تمي الأمـديد / دقهلية
التعليقات مغلقة.