” الحال مشروح ” شعر سيدة القصاص

زهراء المشرق مجروحة
عمالة تنوح
وأنا قلبي معاها
بيتفتت
نايح مجروووح
هيروشيما
ولبست توب شرقي
وعشانها بيصرخ
صوت ” بَرْقي “
وعيدان الأَرْز مسجية
هجرتها الروح …
والقسوة ف قمة
قسوتها
وخيانة بترقص
بصمتها

بيروت اتهتكت براءتها

والباب مفتوح
عصافيرك
مسكت نار فيهم
وشموسك
غامت ضواحيهم…
ومرافئ قلبك بتولول
ف نهار مشلوح …
طب مين
ها يمد الإيد ليك
ويرد
الروح جوه واديك
و #البوم بيحنط لياليك
والحال مشروح …