الحضره بقلم أحمد كريم

فى الحضره الناس كلها حاضره
طالبين العون وياريت نظره
ومدد ياحُسين وصلاة الزِّين
ونفيسة العلم انتى ياطاهره
تسابيح ومديح
زغاريت تفاريح
ونفوس حيرانه رماها الريح
ودموع موجوعه جنب ضريح
والناس مساكين
جايين تايهين
طالبين التوبه لقلب جريح
وصلاه وركوع
وندور وشموع
وكفوف مرفوعه بكل خشوع
أجساد م النشوه بتتمايل
ولسان يشتكي من حال مايل
والهم المجدول في جدايل
وده قلب بيحلم بالراحه
وبقالُه كتير وماهوش طايل
في الحضره كتير م الناس ياما
دراويش بتعيش
علي ذكر الله
ملهومشى خلاص فى الدوّامَه
ودَه جاىّ يزور
وده عندُه قصور لكن مكسور
ودي ناس بتلِف
وناس بتدور
من كُتر ماتاهت فى الضلمه
ملهوفَه على طاقة نور
طالبين العُون وياريت نظرَه
ومدد ياحُسين وصلاة الزِّين
ونفيسة العلم انتى ياطاهرَه