الحلم وتفسيره في تلك القصيدة .. التي لم أعنونها .

أشرف البنا

بتضحك ليه علي الدمعة
اللي بتنور في عين صاحبك
بقلب سليم
انا يا صاحبي ليلي قديم
و متعود علي الضلمة
و باستني دموع عيني
تحلي مرارة العتمة
و تخلق م الليالي نهار
يقول الله
متستغربش يا صاحبي
من الدنيا و م الأصحاب
من الخير اللي كان يوصل
لحد الباب
لا كنت استني رد جميل
و لا تعليل
انا اتعودت ع النكران
مانيش زعلان
انا خدت السما بحالها
بكل نجومها و غيومها
في نظرة عين
ما شفتش منها غير ضحكة
بغمازتين
و شفت سحابها ف البرواز
حمام هزاز
بيحدف للقلوب جناحين
عبير و رزاز
تطير وياه
و لا حول و لا قوة
بغير الله
انا ملحي و عيشي و روحي
للأصحاب
و أقول الله
بلاش تنظرلي باستغراب
انا مش حمل فص عتاب
انا حضني شبيه البحر
بتتفتح دراعاته
لكل غريب
و يحكمني قدر و نصيب
لسان ذاكر
و دايما للقضا شاكر
لسان بيشم ريحة الحق
و مش بيخاف
يزيد القهر علي جوفي
يصيبه جفاف
ما اقولش العيب
و با نصب للصحاب مقامات
و للجملة و للكلمات ..
مقام تاني
يلم الشعر و القافيات
بخور النية و سحابه
حصاد كرامات
و قلبي براح
يعيش سواح علي الأحلام
و يتشبه لبرج حمام
يعيشها سلام
و يعشق كل بنية
و بيلاغي الصحاب و الناس
تعالوا و صفصفوا النية
و حكمة نبض شريانه ..
( الفرح فكرة مجاورة للأوليا )
تعيش بين النجوم في سماه
تقول الله .
تعالي يا صاحبي نحسبها
بلاش تأنيب
معاك ف الدنيا ألف حبيب
و ضاع واحد
لا كان بيجبر الكسرة
و لا ساند في يوم حسرة
و لا واصف لرأي طبيب
مكانش لبيب
و م الآخر
مالوهش ف حسبتك ترتيب
تسيب الألف علشانه ؟؟
أكيد لأة
ده حتي لو كبير شانه
قالوها الأهل قبلينا
لقانا نصيب
و فرقتنا قدر و نصيب
و مرجوعها لحكم الله
ده كله في الحياة مكتوب
تعالي نعلي ضحكتنا
نكركرها
و قول الله ..