الحياة كان لونها بمبي … بقلم هناسعد
الحياة كان لونها بمبي
ليه دلوقتي حياتنا غابة
كنا فيكي قلوب بريئة
ليه اتحولنا لديابة ؟
القوي يستقوي فيكى
ع الجميل أبو قلب طيب
والغني يتحامى بيكي
ع المساكين الغلابة
الحياة بقى لونها غامق
بعد ما اتعلمنا
نكدب
بعد ما اتعلمنا
نبعد
بعدما اتعلمنا
نفهم
كل كلمة
وكل همسة
وكل نظرة
بعد ما اتعلمنا نفارق
اللى كانوا منا فينا
واللى كانو زمان حبايب
بُعدنا ماعدش فارق
الحياة كان لونها أبيض
لمًا كنا صغيرين
مين لونها بالأسود
مين طفى أنوارها مين؟؟
الجميل أبو ضحكة وردى
ليه اتحول نابه أزرق
واللى كنا معاه بنفرح
ليه دلوقتي معاه بنغرق
ولما كانوا يقولو عنه
إنه قاسي وإنه ناسي
حبايبه دائما
كنا بعلو صوتنا
نقول حرام تظلموه
أوعوا تانى تجرحوه
كنا سذج
أحنا كنا صحيح غلابة
كنا ليل نهار بنضحك
مين سرق ضحكتنا منا
مين سرق أيام جميلة
ووزع ببلاش الكآبة ؟!
أسئلة كتير حيرتني!
وياريتني أوصل للإجابة!
لسه جوايا قلب طفلة
ووشي يقابلكم بشوش
رغم إن نفوسكم شابت
وملامحكم شبه الوحوش
ماتيجو نرجع تانى نِحْبي
ونبدأ عمرنا من جديد
يمكن نعرف إيه مِخَبي
وم الإعادة نستفيد
ماتيجو نكبر حبة حبة
ونزرع جوانا المحبة
نجني زهر بياض نفوسنا
ونكون أحلى صحبة
ونبقى لبعض الحماية
ماتيجو نبقى زى الملايكة
نفوسنا صافية
وروحنا دافية
نملا كل حياتنا فرحة
نبقى خير
نبقى حق
نبقى عدل
نبقى الهداية
م البداية للنهاية
التعليقات مغلقة.