الخيل العظيمه بقلم اشرف الشناوى شاعر عاميه البرامون
ولبسنا هدوم عيالنا
من كتر اللى جرالنا
والفقر شد حيله
يوماتى يهز ديله
ويغربل فى الامانى
وبيخطف كل غالى
ويسيب لينا الرخيص
بنموت علشان رغيف
والليل فارد عباته
والحلم شئ مخيف
والموت آخر املنا
نلقى لنا مكان فى جنه
ونعيش زى الخلايق
ومزاجنا شويه رايق
بس الجراح فى روحنا
سكينه وسارقه روحنا
يوماتى عالرصيف
بنموت علشان رغيف
بكره مالهوش ملامح
وازاى نقدر نسامح
والشوك مالى المطارح
والسكه مش نضيفه
وكلاب ماليه الاماكن
وديابه سعرانين
لو حلم فى يوم ينبت
ياكلوه لو حتى فين
ودموع شقت خدودنا
تشنق بالليل ورودنا
وتبيع اجمل مافينا
مافضلش غير قلوبنا
فى الموج زى السفينه
يخطفها الريح ويبعد
يرميها فى اى مينا
نرجع ونشوف وشوشنا
زى ماكانت حزينه
نضحك والضحك صوره
واليد ماليها حيله
وتعبنا من المعافره
على حاجه ومستحيله
احلامنا مش حقيقه
وقلوبنا مهما دقت
هاتموت وسط النجيله
فيه ناس ربك خلقها
مالهاش فى الحظ حيله
هاتموت واقفه فى مكانها
زى الخيل العظيمه …………….
التعليقات مغلقة.