الدنيا علمتنى…بقلم اشرف الشناوى
الدنيا علمتنى
اضحك وسط الجراح
ومهما الجرح علم
هايكون هوا السلاح
عديت يابحر موجك
لقيت كل اللى راح
والجى لسه اكتر
اكتر من اللى راح
الدنيا علمتنى
اضحك وانسى واعيش
وانسى الدموع وادارى
لو حتى مامعاييش
واعيش والضحكه طله
واقول للحزن ياله
واعمله الف فيش
الدنيا بابتسامه
هاتعيشها طعم تانى
اوعاك حزنك يشدك
يدخل جواك يهدك
يعمل بك صف تانى
يرميك وسط الديابه
تنهش فيك الامانى
اعمل وجعك سلالم
توصل للحلم سالم
الدنيا من عبطها
بتعلى فى العوالم
الدنيا علمتنى
افرش طريقى نور
الكلمه لو حقيقه
بتهد اى سور
وتنور السكايك
وبتملا اى بور
والصبح لو بشاير
بيكسر الاساور
ويصحى الحلم فينا
ويخلى الليل قصور
اوعاك لو يوم تطاطى
حلمك هايموت اكيد
ربك هو اللى عاطى
والكل ليه عبيد
الدنيا علمتنى
اقوم وقت الشدايد
واصلب طولى واغنى
لو حتى مين ظلمنى
من حقى اعيش واعدى
واخد م الدنيا حقى
وارسم فى الليل طريقى
واحلم حلم بحقيقى
او ضحكه تبل ريقى
الدنيا علمتنى
عدوى من صديقى ………….
التعليقات مغلقة.