نور سنابلها بقلم / الفلاح الفصيح معوض حلمي
مش عارف لوني ليه مخطوف
حاسس كأني ميت خوف
باعاني من تقـل الكــــلام
وباعاني من عتامة الشوف
مكسوف أقولها بطني بتزغور
والبخت ليه أعور نشن على موتي
حبسولي صوتي بحجة التشويق
والديب بريئ من كل نقطة دم
ماتقولي كلمة تبل ريقي ياعم
أو هاتلي لقمه تسدلي جوعي
موضوعي أبسط م البساطه وسهل
أنا نفسي اهرب من غباوة الجهل
من شكلي واضح إني في العشرين
لكن في قلبي ألف شيبه وكهل
باداري ضحكي أصل خلفه دموع
ممنوع حدودي ف يوم أخطيها
وانت يافندي ف إيدك المفتاح
مكتوب عليا السكه هامشيها
والروح مفارقه لمـة الأفراح
نادي لخيوط الشمس دخلها
وانت اللي عارف سر مداخلـها
دفيني حبه ، البرد جاي عايب
ولحافي دايب من سنين وسنين
لكني راضي ورافض التخوين
ولأني عاشق نور سنابلها
ماشي باغنيلها
وزارع أرضي بالياسمين
التعليقات مغلقة.