الست مراتك بقلم معوض حلمي
إسمع مني كلام من نور
مش هايفيدك 100 مأمور
سلم ليها تعيش مستور
وارفع شأن حماك وحماتك
تكسب ود الست مراتك
طلع يالا الراتب ليها
و العلاوات إياك تخفيها
ياما قالت لك فيها لااخفيها
يبقى تطاطي تفوز بحياتك
تكسب ود الست مراتك
إكتب شعرك باسم جنابها
راح تكسبها وتطفي غضبها
فاوعى تفارق عتبة بابها
راح تتهنى بكل حالاتك
وتكسب ود الست مراتك
وقبل ماتسأل فين الفيزا
شق سكاتها بضحكه لذيذه
قول لها إنتي وبس عزيزه
شغل شعرك واشتغلاتك
تكسب ود الست مراتك
إشتري مني الحكمه وشيل
لما تكون ف البيت ياجميل
إوعاك تغلط تبقى قتيل
إقفل فيسك وإقفل شاتك
تكسب ود الست مراتك
إوعى تآمن مكر الست
إحنا وصلنا زمان النت
مال الحال بالواد والبت
أحرس بيتك لو بحياتك
تكسب ود الست مراتك
التعليقات مغلقة.