السكريبت
منصور عبد المقصود
…
قمت من نومى النهاردة
ورحت أجرى ع الاسكريبت
ايه اللى مكتوبلى الليلادى
شيخ بدقن
والا ضابط
فوق كتافه سيف ونجمة
والا شاب ودوره ثاير ع النظام
والا كومبارس فى رواية
والبطل ابن الحرام
يهبر الهبرة ويجرى
اخد العلقة ودوغرى
اترمى هناك جنب حيط
كاتب القصة العبيط
لسة مكتبش النهاية
والحكاية بسيطة جدا
كل فولة وليها كيلة
واحنا فولة مليها سوس
احنا كلمة وسط قوس
امتى هيجيلوا انفراجة
امتى يشعر انه شييء
الأمل أصبح بذيء
يا جناب حامل قانون المعجزات
لسة عايش
رد لى عمرى اللى فات
ليه تراضينى بالفتات
والجميع مشغول ف هبره
ليه اللصوص فوق المنابر
والفقير نايم ف قبره
ليه….؟؟
كلمة يحفظها الغلابة
ويغمذوا بيها الديابة
والصحابة في يوم وليلة اتشيعوا
وسط همى بعدوا عنى
ويوم سقوطى اتجمعوا
يخبطوا فوق كف كف
الرجى من عقله جف
لسة فيك وكمان بتنطق
أنت ما بتؤمن بمنطق
خش قوسك واوعى تنطق بالعبث
قبل ما ينادى المنادى
وقبل ما يجيك العسس
منصور عبد المقصود
التعليقات مغلقة.