السلخانه..بقلم.. محمد سيوفى
قرد وطلع عالشجر
لمح الأسد حيران
بيجري كأنه في خطر
وباين عليه هربان
سأله بشوق عالخبر
قاله بني الإنسان
عاملين كمين معتبر
وبأمر م السلطان
بيلّمو الحمير للبشر
وساحبنها عالسلخان
قولت اختفي عالنظر
وأشوف طريق زوغان
القرد فيه قام زعق
من غير ولا إستئذان
قاله باينك هفأ
وسايق علينا جنان
ناسي بإنك أسد
وسيد الحيوان
إيه يجبرك عالهرب
وتبان بشكل جبان
سحب الأسد تنهيده
وجاوب الغلبان
قاله البشر دي عنيده
وعقولها في التوهان
يومهم يعدي بسنه
ويتوهو فى العنوان
يوم يعرفو مين أنا
أكون وجبه للسلطان
لانفع ساعتها أسد
ولا حمار كحيان
محمد سيوفى
التعليقات مغلقة.