الشاعر رضا ابو شنب “بيرم المصرى” يكتب :النعمة
بننسي صنعة الصانع
ونحلف تاني بالصنعه
نقول شفنا القمر طالع
ودي حلوة ودي ناعمه
ودي بتصلي في الجامع
ودي بتحب في الجامعه
تهز بوسطها الشارع
وتفضل نارها فيه والعه
و تتمايل و تتمايع
توقع فيها كام اعمي
يقرب منها تتمانع
يا خوفي ابويا يسمعنا
تقرب منه وتبالغ
وتعمل روحها مش سامعه
ورمش عنيها لو راجع
بيرمي السهم من اعلي
يصيب القلب ويراجع
ورمش عنيها علي الاغني
تقوله خلاص مفيش مانع
تقرب او تسمعنا
دا صوتك في الودان طابع
بيدي للوجود معني
وقلبي عمره ما يمانع
بيندهلك و توجعنا
وانت الحب والطالع
وتنزل منها كام دمعه
تخلي الواد هرم رابع
وهو يصدق الاعمي
ويفضل عنها بيدافع
ويعمل نفسه ١٠٠ شمعه
وطول الوقت بيتابع
وينسي العصر والجمعه
وفجاءة يشوفها في الشارع
في ايد صاحبه عشان اغني
وبص بعينه واتراجع
وراح عن قلبه يستغني
و صرخت فيه بصوت لاسع
ياعم بسرعة ودعنا
دا شكلك لينا مش نافع
وبرضه ملكشي في النعمة
وننسي صنعة الصانع
ونحلف تاني بالصنعه
نقول شفنا القمر طالع
ودي حلوة ودي ناعمة
التعليقات مغلقة.