الشاعر رضا ابو شنب
قصيدتي الجديدة
(فايتني لمين)
فينك يأبه فايتني لمين
انا من بعدك شوفت الويل
شوفت الدنيا بتلعب بيا
شوفت بلاوي تهد الحيل
انا من بعدك شوفت الويل
فينك يأبه فايتني لمين
“”””“”””*
شوفت الدم بيصبح ميه
عمر الندل مايبقي اصيل
شوفت اخويا بيجرح فيا
واختي تهز معاه وتميل
ياكلو الحق ويتهمو فيا
واللي يحمل يبقي يشيل
وانا من بعدك شوفت الويل
فينك يأبه فايتني لمين
“”””*
شوفت الدنيا بقت مش هيه
قلبو نهارها وصبحت ليل
وبتترقص للحرامية
والحدايه بتحضن فيل
حرقو الزرع وقفلو الميه
وبيتحكم فينا عويل
وانا من بعدك شوفت الويل
فينك يأبه فايتني لمين
كنت بتنصح فيا تمللي
خلي لسانك يبقي جميل
حاول يابني تكون متربي
اوعي تشمت فينا عويل
اوعي تخلي الدنيا تغشك
تجري بوشك زي الخيل
ارمي الدنيا وحاول تسلك
دا اللي بيظلم يومه طويل
وانا من بعدك شوفت الويل
فينك يأبه فايتني لمين
,,,,**
وانا بتباهي يأبويا باسمك
اسمك جنبي بيبقي جميل
لما بفكر بس في حسنك
بنسي الدنيا وبنسي الويل
وافضل طول العمر ادعيلك
والقي الدنيا تقولي امين
انا متبهدل يأبه من غيرك
وانت يا ابويا فايتني لمين
التعليقات مغلقة.