الصحاب
ايسم فيالة
ماتيجي ف مرّه نتعلّم
نعيش ع الفطره يا صاحبي
ولا نداري
ولا نخبّي
ونفهم يعني إيه أصحاب
دي معناها كبير جداً
كما صوت الآدان يدّن
ويجمع ف الصلاه مليون
ماتيجي يا صاحبي نتعلّم
نعيش ونكون
بروح واحده
ضمير واحد
أمل واحد
ما يوم عن بعض نتباعد
ولا لحظه تخاصمني
أنادي عليك فتسمعني
وما تردش ف وشي الباب
ما تيجي ف مرّه نتعلّم
يطبطب قلبي فوق قلبك
تكون جنبي
واكون جنبك
ونفضل ف الحياه توأم
أكيد بنعيمها رح ننعم
وكيميا الصحبه تربطنا
تفاعل مستحيل يقبل
زهور الحب يوم تدبل
ساعتها بجد رح نقدر
نجيب ضي النهار لو غاب
ما تيجي ف مرّه نتعلّم
نشبّك ف الطريق إيدنا
وناخد م الحنين زادنا
أكيد القُرب ح يزيدنا
معاني الود والحكمه
وبالكلمه ..
ح نقدر نزرع الدنيا
جناين ورد ع الجنبين
و ح نعيش الحياه عمرين
نجيب الشمس م الغيمه
ونمسك تاني ف اللي اتساب
ما تيجي ف مرّه نتعلّم
مزيح العفره ونوزّع
نهار صابح على المخاليق
تكون لعيوني معنى الشوف
واكونلك نور ف كل طريق
أقول للدنيا عندي صديق
بيبقى ف إيدي عكازي
ويبقى ف ضهري يسندني
ولمّا الدنيا تجلدني
بإيده يداوي ف جروحي
وبين روحه وبين روحي
نهار يقدر ف يوم يغزل
خيوط حبل الوصال لو داب
ما تيجي ف مرّه نتعلّم
نجيب أحلامنا ونعيشها
ولو كانت ف بطن سراب
ساعتها بجد يا صاحبي
ح نقدر نهزم الدنيا
ونقدر بالإيمان نبقى
كما دعوة نبي ف محراب
……………………………….
ايسم فياله
التعليقات مغلقة.