(العزوة واللمة) بقلم الشاعر بقلم مدحت رياض
العزوة موش بالعدد
ولا هي باللمة
العزوة ضهر وسند
ومحبة وبذمة
وتلاقي حضن في الم
وتحس بالضمة
ووقت ييجي التعب
يدولك الهمة
والف اه تسمعك
لو تشكي من جرحك
وقبل ما بتبتسم
بيحسوا فين فرحك
صدقني موش بالعدد
لو كنت يوم موعود
دي هي مين في الالم
دايما معاك موجود
ومهما تحسب لها
دايما معاك معدود
موش بس زحمة في فرح
واسامي تتسمى
العزوة موش بالعدد
ولا هي باللمة
العزوة بيت بالدفا
مدهونة حيطانه
وجوة منه الامل
والفرحة الوانه
لومرة واحد حزن
في الكل احزانه
العزوة قلبك يعيش
في قلب من صانه
وشال في برد الشتا
ع الكتف بيدفي
وروح تحس الوفا
والكلمة بتكفي
تشيل هموم الزمن
في ثانية وتصفي
موش مال وكنز ودهب
في الارض يترمى
العزوة موش بالعدد
ولا هي في اللمة
العزوة ناس توحشك
لو جات علي بالك
تلاقي نص الطريق
بقلوبها جايالك
ونظرة منها الامل
والدنيا تحلالك
العزوة ناس تعرفك
بصراحة وبخفة
موش بس وقت اللقا
ولا كدب في الزفة
الناس دي توزن دهب
لو تيجي في الكفة
التعليقات مغلقة.