الفراق
بقلم … رحاب عمر
عارف الفراق …
مش قهر ووجع وبعد وآلم
لكنه
بداية تعيسه لقلب انظلم
جراحة لحتة غويطة فى مشاعرك
لا يمنع وجعها
رجوع أو ندم
وخيط جوا روحك
بيلضم فى ذكرى
وكل أما تنسى يفكه العدم
وفيه جسر بينا بنيته فى سنين
فى لحظة بدور لقيته اتهدم
ولمسة بريئة سايبها الزمن
علامة لكفك على جلد روحى
تأكد لى أن وجودك حقيقة
ولا مرة قدرت تخفف جروحى
فراق يعنى بعد
فراق يعنى موت
وانا بعد منك قتلنى السكوت
بخبى المشاعر فى قلب الدموع
وببعت رسايل بدون أدنى صوت
صراعنا وخلافنا فى معنى الفراق
فجأنا فى كونه مخبى فى تابوت
حقيته بتقطع علينا الحياة
وتصبح أمالنا خيوط عنكبوت
ندور فى معنى إذا الهجر فايت
ولازم يفوت
ويبقى غيابنا مهواش فراق
مهواش قنوط
لكنه بيحصل لما المشاعر
فى قلبك تموت.
التعليقات مغلقة.