القصائد التي شاركت في يوم العامية الخميس ١٦-٧
يقول المهندس مجدي سالم
النهارده لشعر العاميه بس يا أهل الدار؟
م انتو بترجعونا لألف ليلة كل ليلة
إكمني عاشق شهرزاد والعشق نار
طب على الله يرجع.. شهريار
لما تحب تفوت للشاعر وائل هيبة
لو تحب تفوت وتنجح
يبقي لازم ليا تمدح
لما أمد ايديا أسلم
تبقي شجرة خير بتطرح
واما أكون زعلان دي كارثة
سيف وفوق الروح بيدبح
لو هتطلع فوق هتزأر
بس لازم برده تنبح
مش هتدفع لأ هتاخد
كل حاجة هناك تشجع
إلا حاجة بسيطة جداً
سيب ضميرك لما تطلع
سيب كرامتك بس خدها
من ضعيف مش لاقي يشبع
عيش حياتك وأنسى أهلك
وأنسى جيت من أي منبع
المهم ازاي هتكبر
والمهم ازاي تِجَمّع
لما تطلع فوق هذلك
أصله برده الذل ممتع
بس هفضل برده سايب
بيننا خيط ولاعمري هقطع
يمكن أنت في يوم هتسبق
خطوتين وأنا ليهم أرجع
واللي كنت بتاخده مني
يبقى حق لابد يرجع
للي كان وياك مصيره
واللي ناوي يبيع ويطلع
شيماء عادل-جدران ورق
جدران ورق
حاضنه اللي باقي من الساعات
بتضمنا بلون الشجر
اللي الخريف سقط سنينه
ف ارض بور
الساعه ليه عقربها مات
والقلب ليه أصبح حجر؟
جدران ورق
بتلفنا كالعنكبوت
مليان خيوط
والقلب من كتر الوجع
ما بقاش بيسأل
امتى اموت؟
جدران بترسمنا بوشوش
اوقات عبوس
واوقات بشوش
جدران ماليها الخوف
من كل الوشوش
حاضن يا جذع النخل
قلوب البشر
جدران وباشت من سنين
ورجعت الملم منها
ما لقيتش منها غير يومين
والباقي كانلي
سنين عجاف
نَفَضْت ف قلبي حزنها
اتاريها زهقت م الحنين
تاهت بضل المجروحين
انا قلبي معدوم م الفرحه
وتملي حزين
والفرحه جبانه
بتعدي وبتلف علينا
وبتنسي الوعد
والوعد الزايف كان عمري
بايش م الدمع
خايف
زايف
كان وعد ومتلون اوهام
وانا عمري معاك دايما نسيان
لو تعرف كام دمعه ف عمري
خافت لتبان
والآخر كان اخرك تهرب
وتسيبني ادور ع طيفك
بلاقيه اوهام
انا دايره ومقفوله عليا
بتمنى تكون ضماني معاك
شاطر تتشطر على روحي
والروح عشقاك
اركن ف رصيف قلبك ليله
لو حتى بموت
دي الزحمه تابوت
والعمر الفاني من غيرك
جدرانه سكوت
برسم ف الصبح ضمير ميت
رافض للحق
والحق احق
لكن ف قانون البشريه
دايما مرفوض
وانا بعدك رافض اكون مبسوط
الصوره الوان
مكشوفه وبروازها بيلمع
والسن صغير عن سني
والقلب عجوز
مليان كراكيب
من امتى قررت تغيب
بتعيد غلطاتك من تاني
بتسيب الايد
والصوره الأولى بتتعاد
والدمع ف وسط الحاره وحيد
شاركت الدكتورة وجيهة السطل بهذه القصيدة للشاعرة زينات القليوبي
( من وحي زيارة لدار المسنين)
بتلم ليه الهدمتين والطرحتين والشبشبين ؟
ماتقوللي يا ابني واخدني فين؟؟؟
علي بيت جديد؟!! .. ما أنا ليه بيت
هو أنا يا ابني اشتكيت؟
مش عايزه يا ابني بيت جديد…
البيت ده انا
عشت فيه خمسين سنــــــــة
ما اعرفش غيـــره أي بيت !!!
أنا جيت عروسه صغيرة
وقعدت فيه لمّا اتحنيت
مين اللي قال أنا عاوزة بيت؟؟
اِسأل بلاط الأرض .
واسأل كـــل حيــط..
مش عايزة غيره أي بيت
أنا عشت يا ابني سنين هنا ..
وأتمنى اموت برضك هنــــا
أفتح عينيه كل يوم ..
وأقفل عينيه كل يوم
على فرشتي ومخدتي والبطانية واللحاف..
على أيد أبوك بتضمني ف صورة الزفاف
بتدفي قلبي وتحضنه ف سنيـــــــن عجاف
في الأوضه دي
أنا لسّه عايشه ويّا بوك عمري اللي فـــــات !!!
أصل الحبايب لوسابوك،
بيعيشوا فيك بالذكريات ..
خليني يا ابني ويّا بوك أصحي وابــات
واشم ريحته ف الحاجـــــــات….
وأعيش معاه باقي الساعات
مين اللي قالك .. إنه مــــــــــــــــــات؟!
لسّّّه البدل جوّه الدولاب ..
جنب السرير آخر كتاب.
نضارته أهي وعبايته أهي
ولسّّه سجادة الصلاة..
والسبحة فوقها منـــوّره ف سنين عجاف
ولسّّّه بااسمع ضحكته وسط السكـــــــات
أنا عايشه يا بني.. بحاجة أبوك متونِّســــــــه
وبدخلتك ويّا العيال متونّسه
ونا عارفه يا ابني،،
إن خدتني البيت الجديد
رايحه أتنســى ..
وأنا يا ابني مش عاوزة أتنسى ؟!!
إن كنت محتاج الوســع لجْل العيــــال؟
هات العيـــــــــــــال
أنا عندي يا ابني سرير كبير
حارْقُد على حرف السريــــر
وحاسيب لهم باقي السرير
وإن كنت محتاج السرير ؟؟؟.
خد السريــــــــــــر!!!
إن شالله أنام فوق الحصير
لكن أنام وسط الأمـان !!!
خليني يا ابني ف وسطهم ..
قدّرني (واحده) منهــــم
أصحي وأبات على حسّهم باقي الزمان ..
وماهوش كتير ؟؟؟..
صدقني يا ابني ماهوش كتير !!
أنا مش حاعيش أدّ اللي عيشته
ولا نفسي أعيش بعد اللي شفتــه …
كمّل جميلك .. واستر الباقي ف حياتي
أنا عمري يا ابني قصاد عينيك ..
فرّطت ف أمي أو حماتـي؟
إن كان ده مني ف يوم حصل
أنا كنت أقول باخد جزاتي
ما تقوللي إيه خلاني يا ابني أهون عليك؟
وساحبني ويا الهدمتين
رايح تسلمني بإيديك
فرطت ف اُمك؟.. قوللي ليه؟؟؟
أنا عمري يوم فرطت فيك؟؟
وإن كان على ضيق المكان
ما أنا قلتلك خد السريـــر !!!
وإن كان على ضيق المعيشة
أبوك سايبلي معاش كبيـــــــر
قسمته يا بني من زمان: النص ليك ..
والربع مصروف العيـــــال
والباقي مصروف الـــــدوا !!
لكن خــلاص..
وحياة عينيك ما عاد حايلزمني الدوا
خد المعاش .. كل المعـــــــــــــاش !!!
لكن بــلاش ..
أحس إن ربايتي فيك راحت بـــلاش
كشف حساب
بفوت من وقت للتانى
على امبارح
وأسند روحى على عمر
وزمان عدا
واتشعبط ف كااام سكه
نواحى العشره تحدفنى
نواحى الصحبه واللمه
والاقى الحال ماهوش هو
حكاوى العمر فاض بيها
وملت م السؤال عنا
ملامح بيتنا بهتانا
وحابسه الدمعه ف عنيها
وسايقه علينا كام بكره
نلم الشمل من تانى
صلاة الفجر بتأدن
وتسأل ع ال غاب منا
وفاضل كام
على الفرقه ال صحبتنا
بواقى العشره غضبانه
وقافله بيبنها من يومها
وطافيه النور
وعامله حداد على الضحكه
اللى فرقتنا
وعازمه الوحده على قهوه
وقاعده ليل
وتعبت سكتى مشاوير
بلف شوارع الذكرى
اجيب حبه امان صابحين
اصبر نفسى بريحتهم
وارمى سلام على اللى كان
ف حضرتهم
بتفتحلى الحياه بيتها
وكنت استحلى قاعدتها
وتصحى الفرحه على صوتنا
ترش وشوشنا بالبهجه
نحس لا اهه جوانا ولا احزان
بواقى العشره موجوعه
وكل ماتهدى ف بعادنا
تقوم من نومها مفزوعه
تلف ف دايره الحيره
وتفتح دفتر الاوجاع
وتتحايل على النسيان
ياخدها ف حضنه ويسمى
ويقفل صفحه عيشناها
بقيتها يادوب
عذاب جارى
وكشف حساب
ولاء البركاوى..
يا حرف يا مسافر
شعر سيدة القصاص
ياحرف مالك
ليه عزيز ؟
هربان ودايرة
أسال عليك
قواميس
حياتي اتدوبت
في بحر
وغاص المعني بيك
مرجان ياقوت
حبة سكوت
والصرخة
منقولة بحانوت
علي ضهرها
شايلة الفِكَر
صفَحات
ودنسها ( الهَكَر )
والشِعر
وَاقف مُنْكَسِر
عاوزني
أمِده بالقَصِيد
يا حرفي
يا مسافر بعيد
ارجع…
رجوعك ليا عيد
الحقني
ببنات ( الهِجَاء)
آل إيه
ياخويا اتدللوا
بابعت لهم
هذا… الرجاء
فوق سن قلمي…
اِتْزلزلوا
الحب فاتح
جعبته
والقلب باسط مِية
دِراع
أين اليراع؟
الشعر جاع
والحلم
فاتح جوف كلام
وفتاه بيجَهِّز
وَجْبِته
قلمي
يا أسطورة
اِتْفرِد
إمْلا ظلامِي
بالأمَل
تحلَي الحياة
واضرب برجلك
يا قلم
يطلع لقلبك
ميت نهار….
تملاه عَمار
وهيلتئم
كل انكسار…
ف َ باختصار
مافيش ظلام
من غير نهااار…
يا حرف
امسح دمعتي…
وارفع شعار
البت دي
عاشقة الحروف
والشعر ف عروق
دمِّها
عاشق سَمااار
وإن كات
ف حبه شهرزاد
فالحرف ليها شهريااار.
ندى بقلم منصور عبد المقصود
وأنا من زمان وحلفتلك
مش كل من غنى حبيبتى بيعشقك
ولا كل دمعة دمعِت من كل عين
كانت دموع تشفى الوجع
و أنا من زمان وعِيتْ فى قلبك
وهمست له
مش كل من هاجمك حبيبتى بيكرهك
ولا كل من مدحك أصيل
تماسيح بتبكى من الشبع
وعيون بتضحك م الوجع
وانتِ اللى فى الآخر حَكم
فمتسمحيش
للى حَكم
يكتب على جبينك حِكم
ويسلى بيها المطحونين
اتحملوا
واتقندلوا
طب ليه الألم
ساكن فى قلب الطيبين ؟؟
والاغبيا تنطق عيونهم بالفرح
طب ليه
مش كل من زرعك طرح وقت الحصاد ؟؟
ولا كله دايق قسوتك
طب تحلفي
والا تسيبيني أحلف انا
انا قلبي شبعان م الغرام
وبقول حرام
قلبك ده حته من الحجر
إحساسي بيكي
الجمر ما يتحمله
وده أصله كان من أوله
احساس وليد
شافك في قلب نهار سعيد
ليله استحى
من نور جبينك قام رسم
قطرة ندى
ع الخد نادت ع العطش
من بين بحور الكون
عشقتك يا ندى
صبحي ابتدا
لما لقيته ف سكتك
ورد الرصيف واقف بيرصد مشيتك
بتزيدي ليه من خطوتك
اتمهلي
ده العمر لسه في أوله
والشوك بأيدينا نحوله
بستان امل
فمتهتفيش
ومترفعيش
كل البيارق للسما
ومتطلبيش
م اللي كسر جوانا فرحة عزنا
انه يكمل حلمنا
حلمي وحلمك كان بسيط
وانت اللي دايما مؤمنة
أن الأمل جوانا لازم يتولد
واللي اتولد كان مسخ مش مخلوق لنا
احنا اللي بحنا بحبنا قبل المعاد
قبل الطريق ما نمهده
ونحدده
مين اللي غير في الشوارع قام بنى ميت ألف سد
ليه كل جسر من الاماني بنعبره يتهد
ليه استكتروا عل القلب حبك يا ندى
د العمر لسة ف اوله
والكون فسيح
كل اللي خانك من زمن
خانوا المسيح
شجر اللهموم ع الارض
ما بيهزه ريح
اياكي يوم تستسلمي
وتسلمي
كل الرايات
واياكي لحن الخوف
يصيب الاغنيات
عاايشة ما بينا الامنيات
لكن ساعات
الحلم
بيصيبه المرض
لكنه مش ممكن يموت
لو مات في قلبك يندفن
منصور عبد المقصود
ذكرياتي بقلم مها الخواجه
بين كلامي والسكات
عقلي شايل ذكريات
تفني عمري ف التمني
واحتمالي كلّ مني
واطلب الأيام تعِنّي
تتهمني بالانفلات
كل ما دا الحمل يتقل
والتفت للدنيا وأسأل
ألقى في الصمت الجواب
راضية حالي ف العذاب
قلبي ملّ م العتاب
وامتلك روحي الشتات
كل يوم احفن ف دمعي
بايتة ليلي مطفي شمعي
ذكرياتي بتكوي فيا
والحنين ملهش دية
يقتل النفس العفية
تسكن الروح الأهات
……
مها الخواجه
صباح الشوق بقلم عبير عبدالمنعم
صباح الشوق بطعم حنين
صباح رايق ومتعايق وفارد
ع القليب جناحين
صباح ع اللي
ما داق الحلو في ايامه..
لكن الحلو داق منه
بدال المرة قول الفين
صباح الكحل في عيونها
بينزل جري ع الخدين
بدمعة شوق محنية
ورمش يوشوش الجفنين
يا حلوة روح معديه
وزارعة الضي ع الصفين
ربيعك كان بساط أخضر
مشفتش في جماله اتنين
ينام الشوق على كفي
نتوه أنا وانتي
من سيرته
ماهي سيرته غنا وبساتين
بتطرح فرحة م الحلوة
حزانى الحب ليه شاريين
صباح تفاريح على المجاريح
ومن مر الوجع شاربين
على حضن البراح نرتاح
ويشرق في الضلوع شمسين
على صورة لقا حلوة
ما بين حبيبين
بيتحدوا الفراق المر
على ناصية هوى ماشيين
صباح إخلاص
على اللي احتلوا ضحكتنا
وملكوا م الوداد فدادين
عبير عبدالمنعم
مسكت القلم – منى الشوربجي
مسكت القلم
وقلت اكتبلى كلمتين
قلت يعنى يمكن اوصف
اللى شفته ف جملتين
ولسه يادوب
باحط ايدى ع الورق
تاهت حروف كل الكلام
كل الحروف طبعت قلق
ولقيت سطورى اتيتمت
من قبل حتى ماتتولد
مات الجنين
جوه احشاء الورق
ازاى تموت الكلمة قبل ماتنكتب
حسيت بعقلى خلاص
ده قرب يتشطب
الحبر مات ف قلب انبوبة قلم
حسيت بشئ يشبه ألم
يشبه ضياع رسمه عدم
احساسى هزنى بقوة
بكيت وحزنت من جوة
وجاية عندكم اسأل
وغير الحب ماهأقبل
لدنية قلب كان لونه
ف دقاته لبن بحليب
هيفضل دمنا واحد
ورسمة طفلنا هلاله
مع مينا رسمله صليب
اقول لكوا إيه
وجعنا قلبنا بينا
وتحيا مصرنا لينا
هيفضل طه ويا حبيب
ايد واحدة
ودنيا كلها شاهدة
وتعلى أغلى راياتنا
مرسومة عليها هلال
مقابلها فى وشه صليب
عزة محمود علي حسن
وبتدور على الضحكة ف قلب الهم
يا عم اتلم خدلك جنب م الأحزان وفوت الغم
وطبطب حبة على قلبك بحنية ده لحم ودم
ومين غيرك هيفرح لك وأنت يا قلبي
نبت يتيم لا خال ولا عم
تقول عبير عبد المنعم قصيدة ستولد الأن هنا وكلماتها تطير أمامي وختامها؛
شاعرة الحرافيش!!!
شاعرة الحرافيش
وبالعامي
راح أوصف
حيرتي أنا وهمي ..
راح ارسم ع السطور أغصان
عليها دمعكم هيبات..
ما انا شاعر
و أنا قوال
وهكتب ليكوا كام موال..
على وزن الدموع مرة
ومرة في الفرح يتقال..
وآسف مرة لو حبيت..
أغمي عنيا من نفسي
وارسم حرفي زي رغيف
وجواه الغموس الوان
وابعت منه كام ضحكه
على خدود البنات هتبان
واجعل م الحروف مزازيك
ترقص قلب كان تعبان
واعمل م الكلام خلخال
واعزم الف عم وخال
واجيب الطبلة ويا الرق
على صقفة عيال وعيال
وافرح قلب كام درويش
واخلع همهم واعيش
وارجع ضحكة لام شهيد
على تراب الوطن نامت
واوزع حرفي ع المحاسيب
في حضره والفرح نابت
وانصب بالكلام افراح
واقول للحزن ااقف ثابت
ايديك جنبك وصم الفم
دموع الحزن اهي تابت
في حضرة شعر أشعاركم
ما انا شاعر من الحرافيش
عبير عبد المنعم
الحب بالمقلوب بقلم عصام فؤاد
متفسريش الحب بالمقلوب
وتخلي النشوة تخدعك
لما أبان مغلوب
فقط ويا دوب
أنا ماسك خيط الرضا
بالمحسوب
فمتظنيش إني خلاص
ساكن و حَبوب
ومتقطعيش شعرة ( ح اعديها )
وخليها ماسكة ما بين الود والعزة
أنا بعرف إمتى أكون أنا
إمتى خمور الحب تسكرني بلا مزة
إمتى العين تحمر وتحذر
وتنبهك
الحب ااه
وقلت لك ااااه
أبان مغلوب
لكن عمري وميت لاااااا
ما أبات في يوم
مسلوب
مشاركة الشاعرة نهى بدوية
انت اللي فارقت قلبي
ومشيت من غير وداع
راجعلي ليه بتبكي
ما خلاص الحب ضاع
كنت بتوعد وتحلف
وتقولي كتير وتخلف
ان الفراق لا يمكن
يكون طريقنا لكن
اخترت عني تبعد
وتغير في الاماكن
انا قلبي كان بيقسى
لكنه مكنش داكن
وسافرت كتير في جرحك
والجرح في قلبي ساكن
راجعلي ليه بتحكي
وتقولي انسا اللي فات
في بعدك كنت ببكي
واصرخ من غير اهات
وعايزني انسا تاني
انسا الماضي وزمان
والجرح واللي كان
راجع ليه
وجع بقلمى هنا سعد
لما الوجع
حس بوجع
كتم الوجع
هَمُّه
راح الوجع
يشكى بوجع
هَمُّه فى حضن أُمُّه
بص لعينيها
ورعشة ايديها
رسم الوجع
وش السعادة
مرضيش يقول غَمُّه
بَصِّت بخوف
قالت عينيها
من غير حروف :
دُقت الوجع
وشربت من سِمُّه ؟
موجوع صحيح
بايت جريح
مغصوب مع إنّه
حالف يمين
ما يبان حزين
ولا دمعه تنزل
من العنين
ويبتسم سِنُّه
وجع هنا
ووجع هناك
والصوت أدان
يملا المكان
بس الودان صَمَّا
والشوف كمان
محتاج دوا
خلا عيونه
مزغلله
محا الحقايق
فى الهوا
ويبان عليه
انه برىء
بس البجح
قلبه جرئ
شوّه بكدبه سمعنا
وبيفتكر غنَّى
قول كمان
دندن بصوت البغبغان
إنسى اللى كان
له شنّه وله رنّه
شيطانه
بقا عاطل !!!!
عمل اجتماع سرى
لكن عاجل
تدبير وفكر جهنمي
شيطانه بات حاير
جمع العشيرة
من العروق
لما نشف دَمُّه
لملم جميع جِنُّه
مالكم مكان
مع انسان
بنستعيث مِنُّه
سالي سلامة
يشعرنى صوتك بدفىء
واحمل حبك صبح مساء
واعشق فيكى قلب الحنان
وأشعر انك انت الحياه
وانت البقاء وانت النقاء
فيكى التواضع والكبرياء
وأشعر انى شخص يؤدى
التحيه والانحناء
لملكة القلوب كروان الصباح
والمساء
مشاركتي في يوم شعر العامية
“النبص المبني للمجهول”
بقلمي/مدحت رياض
دقة تاهت جوة مني
وشمس ضيعها السحاب
قلب دايب غصب عني
حضوري متسجل غياب
مين علم الحنية تقسي؟؟
وتنقلب بحرين عذاب
بحر البعاد
والشط غايب والمدي
بحر اشتياقي
وردة تترجي الندى
لحنين علي اخر وتر
اتشد من عزم الضنا
والناي قديم ألفين سنة
معرفش يسبق دمعتي
معزفش فرحة تضمنا
صوت البعاد دايمًا مخيف
والغربة فوق نفس الرصيف
تخطف دموع زي المطر
والقلب يتحدي الخطر
وإيدين تعافر تتشبك
تنشد من نفس الوتر
تنزف أنين
تعزف نايات المجروحين
نفس العتاب
فحضوري يتسجل غياب
وشراعي مفرود للسحاب
والمركبة متعذبة
بين موجة في بحور الشجن
وعيون بيسرقها الزمن
تدبل وتدفع ميت تمن
برضه الغياب هو الغياب
والمرسي أبعد م الحمول
المتعبة
محبوسة جدرانك قلق
وزهور تنبت في الخلا
والريح عفية تهزها
وكأن طوفانك بدأ
غطي الجبال فوق المدى
وكهوف حياتك في الغرق
كل الحياة من بُعدها
أنهار بتجري بعكسها
تيارها شادد قوته
عمرك ما تقدر تغلبه
ولا مرة توصل عندها
شيل المطر
وقف طوفان لو تقدره
ما هو لو قدر
ازاي بكلمة تغيره
والسطر محفور في الكتاب
أسهل عليا أتعوده نفس العذاب
وحضوري يتسجل غياب
مشاركة الشاعرة مرڤت البربري
بيني وبين حنانك سور
وجزر الهجر ومد بحور
وانا حاير
من شط لشط
كما هاجر
بدور على كلمة تبل الريق
وأنا اللي غريق
في بحر الحزن
مايروي عطش قلبي
غير لقا عنيكي
وبناديكي
تجيني وتقربي المشاوير
دا انت الندي لورد النيل
وعنيكي
نجوم
تسقي القمر في الليل
يابنت الحور يا جنية
مأسورة
ومسحورة
وسحرك طلسم ما ليه تعاويذ
يا قادرة
تهزمي الخاينين
باشارة يتعلقوا فـ براويز
وعليهم سواد شارة
وكلمة تقول.. لكل جبان
ادي مصيرك
ومسيرك
هنا دفنك
ويطل الفجر في صباحك
يغزل أمل بكرة
يا عالية يا أم تاج ع الراس
أنا العاشق لترابك
وعلى بابك
سجدت طالب رضا الرحمن
وبدعي لك وأصلي لك
يعود فرحك
وأغني لك
مرڤت البربري
بسعر الكاش شيماء عادل
بسعر الكاش
ماهو ببلاش
ضمير ميت
لكن بكاش
بيغري الكل بكلامه
واوهامه بترسم جنه ف طريقنا
بيتصدق
وناخده بحب بالاحضان
عليل يا قلب يا مصدق
ضمير لشيطان
حكاوي الليل بتسمعني
وتحكي كتير
عليل قلبي بيوجعني من التفكير
بساند نفسي من غير حد
ووقت الجد
بكون خسران
عليل قلبي بقاله زمان
بيرفض يسمع الكداب
ماهي موضه
بنتزين
وعاشق قلب كان هين
صبح قاسي من الايام
حواري ضميرنا مغشوشه
ومرشوشه بلون قلبك
وصارت لعنه ع المخاليق
وانا رافض ف وسط الضيق
اعاتب حتى لو نفسي
انا راضي
اعيش بينهم
وزيفهم موضه مرفوضه
و محبوبه لناس تشبه ضمايرهم
رصيف مكسور
يشع ف نور
وقلب الناي بيرسم للحنين سكه
وسكتنا ماهيش بمعاد
نلف بلاد
ونرجع تاني للسكة
ولو ماتت ضمايرهم
ليوم الشعر العامي
فى ذكرى وفاة اخى الأكبر
كتبت هذه الكلمات
“فرحه ناقصة”
بقلمى هنا سعد
كل فرحه بعدك انت ببقى حاسه
كل فرحه بعدك انت فرحه ناقصه
كل مااضحك اقوول لنفسى
ازاى ضحكتى !!
وانتى عارفه أن روحه مفارقه ناسها
روحه فارقت دنيا فانيه واحنا فيها
نرتاح ونسكن جوه بيوت هو بانيها
هو روحها.. هو هواها .. هو أساسها
متجمعين لوحدنا …من غيرك أنت
نهنى بعض…..
متمنين أبدا ماحد تانى يبعد
بس حقيقى بُعدك انت اصعب وأقسى
فاكره كل كلمه قلتها مش قادره انسى
كنت عايش جو كل حد فينا
عايش حقيقي مالى حياتنا مالى روحنا
مالى بيوتنا ضحكه صافيه
بس البيوت عايشه فينا من غير ونسها
الفهلوي بقلم رضا يونس
………………………
عم عبده الساعاتى..
خبير ف الجيلاتى
مهندس وحاتى …
غفير ليله صاحى
ومرشد سياحى
بيسهر صباحى
مفتى وطبيب
في طبعه غريب
يصلى بصليب
محامي وحرامي
وظابط نظامى
ولص وعصامي
يحب الزمالك
واهلى كذلك
يقول خدلى بالك
انا فاهم سياسة
وطاهر نجاسة
وغبائي كياسة
بيوفي العهود
ويخفى الشهود
كطبع اليهود
عم عبده الساعاتى
بيجي يومياتى
ينغص حياتى
رضا يونس
وناديتك حتى فى احلامى…عصام ادوارد
وناديتك حتى فى احلامى
اشتاقلك بتدوب اوهامى
واكتبلك بتدوب اقلامى
وناديتك حتى فى احلامى
حبيتك من غير مااشوفك
لو يوم اتملى من طيفك
او يوم حتى اسمع صوتك
وبحبى راح يبعد خوفك
وبحبك راح اعيش ايامى
وناديتك حتى فى احلامى
شفتك بالفرحه مضويه
والنسمه حواليكى تهفهف
والنجمه فى سماكى تنور
وفى سيرتك راح يحلى كلامى
وناديتك حتى فى احلامى
بتحبى بقلبك وعنيكى
وانا قلبى مشغول بعنيكى
وجناحه يرفرف حواليكى
ياحبيبتى ماتردى سلامى
وناديتك حتى فى احلامى
عشتك جوه خيالى حبيبه
وعملتك قصة حب عجيبه
نفسى فى يوم اشوفك جنبى
تملى صحوتى ومنامى
حبيتك حتى فى احلامى
زين ممدوح مجرد محاولات رباعيات
اوعاك تبيع ضميرك
ولا تهاب الناس
اللى يطاطى يوم مره
بكره بالرجل ينداس!!
عروس البحر شعر
صبري الصبري
عروس البحر في عرس الخيال
بواقعك الرقيق سنا احتفالي
حضرت الى الجميلة باشتياقي
وقلبي يشتهي عشق الجمال
ببحر مالح قد رمت سقيا
خلايا مهجتي نبع الزلال !
بحر لافح اختار ركنا
رطيبا طيبا باهي الظلال
توخى خاطري حذرا بوقت
تناهى في نوى وقع المحال
تعدد ملتقى اقبال قلبي
بشاطيء عرسها في خير حال
ولما استعذبت روحي نداها
وصرت مواصلا صدق الوصال
تحدث خافقي عنها بشعر
يسجل للورى نبض السجال
بثغر بلادنا حسن تجلى
بابهى منظر صافي المجال
اروم بجوها الوافي سكونا
واهوى منتقى حلو المنال
ويبقى ودها بالروح دوما
نقيا يرتقي مجد الاعالي
عراقة دهرها يروي فخارا
يمهد للورى درب اتصال
بارجاء الفصول الانس يحلو
لديك يؤمها طهر الجلال !
مشاركتي في العامية
من وحي نشيد الصاعقة المصرية شعر صبري الصبري
قالوا ايه علينا دولا قالوا ايه
مصر الحبيبة يا عروسة
يا غالية دايما محروسة
كل الأعادي مفروسة !
قالوا ايه
قالوا ايه علينا دولا قالوا ايه
جنودها خير الأجنادْ
عزيمة عالية وسدادْ
أبطال شجاعة ورشادْ !
قالوا ايه
قالوا ايه علينا دولا قالوا ايه
دا جيشها جيش الفدائية
بهمة بالبأس قوية
مصر الحبيبة المحمية !
قالوا ايه
قالوا ايه علينا دولا قالوا ايه
شرطتها في كل مكانْ
في مصر أمنٌ وأمانْ
بنور يقين الإيمانْ !
قالوا ايه
قالوا ايه علينا دولا قالوا ايه
أزهرها في الكون بيلالي
سماحته .. علمه المتلالي
مقامه في الدنيا عالي !
قالوا ايه
قالوا ايه علينا دولا قالوا ايه
وحدة بلادنا وطنية
بحب مصر الحرية
فيها الإرادة مصرية !
قالوا ايه
شعر صبري الصبري
قالوا ايه علينا دولا قالوا ايه
يا قاهره كَيْداً لأعادي
يا كايده كل الحسادِ
يا روضة النيل النَّادي !
قالوا ايه
قالوا ايه علينا دولا قالوا ايه
شعبك يا مصر بأجيالهْ
بيبني بالخير آمالهْ
ويصلح الله أعمالهْ !
قالوا ايه
قالوا ايه علينا دولا قالوا ايه
بـ(سينا) جيشنا بيحرسها
يحمي كيانها ويسوسها
سياسة راسمها رئيسها !
قالوا ايه
قالوا ايه علينا دولا قالوا ايه
يا (سينا) إنتي أمانينا
وروحنا يا ضي عنينا
يا غالية جدا يا (سينا) !
قالوا ايه
قالوا ايه علينا دولا قالوا ايه
(سيسي) رئيسها بنجاحْ
والشعب كله مرتاحْ
وربه هوه الفتاحْ !
قالوا ايه
قالوا ايه علينا دولا قالوا ايه
بحبك انتي يا بلادي
بشوقي بالعشق ودادي
لمصر بالحب بنادي !
قالوا ايه
قالوا ايه علينا دولا قالوا ايه
ما تعلوا شوية !
قالوا ايه علينا دولا قالوا ايه
مش سامع حاجة !
قالوا ايه علينا دولا قالوا ايه
علوا بزيادة !
قالوا ايه علينا دولا قالوا ايه
ما تعلوا كمان !
قالوا ايه علينا دولا قالوا ايه
مصر اطمئنان !
قالوا ايه علينا دولا قالوا ايه
مداخلة الدكتورة وجيهة السطل في يوم العامية
العامي الفصيح ، هو نهج معظم شعراء العامية. وهو أن ينطقوا الفصيح بنبرات ونغمات مختلفة، تبدو في السمع عامية.
ولكنّ للمفردات التي لا تبدو فصيحة، جذورًا في العربية الفصحى،تغيرت صورتها الصوتية مع بعض الضوابط التي تحكم العامية.
فمثلًا عندما يراد بالمضارع الاستمرارية لا الحال، يضيفون الباء في أوله.او يحذفون الهمزات تسهيلًا.
وانظروا إلى أغنية أم كلثوم هذه، وتلمسوا الفصحى الواضحة بين جنباتها، وتأكدوا من مصطلح العامي الفصيح .
حيرت قلبي معاك وأنا(بداري)أصلها أداري ولصعوبة بأداري حذفوا الهمزة تخفيفًا .
قولليعمل(قل لي أعمل) إيه وياك….
ولو قمنا بتحليل كلمات الأغنية كلها، لخرجنا بالنتيجة نفسها.
وانظروا إلى هذا المقطع المرتجل الذي كتبه شاعر العامية المتميز الصديق شرف البنا
معلقًا على تقديم الابنة الحبيبة هيام الزين لعرض صورة لي معها ومع ابنتها الغالية مريم.
كتبت تقول على صفحتها .
((يا نهااار بهجة..
الورد قال للقلم ..
سحر الحروف أخطر
(بيكتبِك) موااال والسطر متعطر..
ياسمينا لون خطوتِك
جوري دا عاش غنوتِك
والفل يوم فرحتك
والبلدي يتمختر!!
فعلق شاعر العامية المتميّز،أ. أشرف البنّا والملقب بملك الملاحم مستكملًا الكلام عني، قائلًا:
النور رسم طلتِك
حبل لشعاع سايب
رغم السمار بسمِتك
سرسوب حليب رايب
حنية متنغِّمة
أطول من الموّال
تشتاق رنين خطوتِك
دقات جدع طبال
سعيِك لحبّ الناس
حسنة ومكتوبة
والخطوة من مشيتك
بالشبر محسوبة
عيشك وملحك شهد
حلال وبالبركة
يافرح ناسك بيه
بالحب متشاركة
رافعة الإيدين لله
بالستر والصحة
واللي قصد مولاه
ماتنساهوش فرحة
أنا مين ؟!؟
شعر جيهان النجار
لزقت مرايتي
المكسورة فابقيت وشين
وبقيت كدابة برغم الكدب مالوش رجلين
أنا مين؟!؟
يامرايتي قوليلي انا ف عرضك إزاي الواحد يبقى اتنين !!
وكسور.. فتافيت… ازاي القصة الواحدة تكون حواديت
وازاي الجرح يخلي العمر سراب
وازاي السكر داب ف تراب
يامرايتي قوليلي ولمى ملامحي وهاتي الوش كأنه شباب
والنبي يامرايتي انا عاوزه اعرفني
ونفسي أشوفني ف وسط احباب
دنيا صفا
دنيا انتباه
بقلم عبير عبدالمنعم
تاه القلم ….ع السطر تاه
ازاي هيوصف خطوتك
جوه الحياة
ازاي هيرسم ضحكتك
وصوتها آه
ياريت تقولي كلمتك
وتحني سمعي بالشجن
وتفتحي الورد اللي غافي
فوق غصونك من زمن
اتنفسي ده الظلم كافر
والامان غالي التمن
شقشقي في صبح الضماير
والسعي بسوط الكفن
استوت احلام عينيك
جوه قدرك والظروف
واللي شافوكي وقالوا
عادي
عمي القلوب ملهمش شوف
كان طبيعي تكوني كعبة
والجميع حواليكي طوف
كان طبيعي يابنت زمزم
تندقي وشم و ع الكفوف
وتقوليلها بكل قوة
دنيا صفا أنا صابرة
لما الانتباه يملاكي خوف
شعر ثناء شلش
وحشتيني وحشتيني
يا أمي ويا ضيا عيني
ونفسي ف حضنك الدافي
تضميني
وحشتيني ياروح الروح
يا فايته لي الفؤاد مجروح
وغصة ف حلقي فين م أروح
وحشتيني وحشتيني
وكنت العزوة واللمة
وكنت الضلة والبسمة
ونوري يمه في العتمة
وحشتيني ياقلب كبير
وكله خير ..وما اتمني أذي للغير
ياحب موزعاه ع الناس
يارحمة وفيض من الإحساس
وحشتيني ودمعي أنهار
ومش راضي يطفي النار
ياريت يا مه أشوف طيفك
يعدي مرة قدامي
ولو حتى تزوريني ف أحلامي
وأشكيلك هموم فوق الكتاف راسية
تضميني وأنسى الدنيا دي القاسية
إلهي يرحمك .ياما رحمتيني
ويجعل قبرك الجنة
ترابة المسك والحنة
ويصبرني علي فراقك لغاية يوم ماألقاكي
وأطفي الشوق برؤياك
وحشتيني يانور عيني
ثناء شلش
مهندس إيهاب كنافة
الوطن مش بس كلمه بتنكتب بين السطور
الوطن دا شمس طالعه منوره جوا القلوب احساس ونور
الوطن عايز تشوفه هتلاقيه جوا سنين عمرنا محفور
الوطن احساس ونعمه ما يحسهاش إلا اللي متغرب و غايب
الوطن هوا الصحاب و الحبايب والقرايب
الوطن هوا اللي ليه جوا القلوب نصيب ونايب
الوطن ماضي ومستقبل وحاضر
هوا اللي لما بينادينا بيلاقينا نقول له حاضر
هوا اللي لما بيشتكي نعمل حساب لشكوته بالف خاطر
الوطن ابويا وامي وصوت حكاوي جدتي وخالتي وعمي
الوطن هوا اللي همه هوا همي
الوطن احميه بروحي وافتديه وارويه بدمي
الوطن مش بس كلمه باللسان
الوطن يعني المحبه والأمان
الوطن يعني انتماء للأرض والناس والمكان
الوطن مش بس كلمه بنقولها من بين الشفايف.
الوطن يعني حد يأمنك ويطمنك لما تكون من بكره خايف
الوطن احساس حقيقي بالفداء مش احساس بَهتان وزايف
الوطن دا احلى فكره
يعني افتخار بالماضي والإيمان ببكره
الوطن حبي الكبير واللي يحب ما بيعرفش يكره .
يا رب احفظ بلدنا برحمتك ارض وجيش وشعب .
واملى يا رب قلبنا لمصرنا كل انتماء وحب .
واحصد رقاب المعتدين بقدرتك يا رب .
ثناء شلش مشاركتي بيوم العامية خلاص خلصت
خلاص خلصت
خلاص خلصت مفيش فايدة
خلاص خلصت ومن بدري
فمتجيش انت فوق الجرح
ترش الملح في صدري
دا من غدرك دا قايد نار
ودمه سال كما الانهار
وجاي انت معاك اعصار
تزود ناره ..فين صبري
خلاص خلصت
خلاص خلصت ماهي الأوجاع
لابد ليها من آخر
وقلبي لأمتي ولأمتى
هايفضل على الأذى صابر
دا استنيت سنين ياما على جراحي
شبعت عتاب وملامة ولو صاحي
فؤادك للعتب واللوم
دا كان بينا المحبة تدوم
لكن من قلبك القاسي
فؤادي للهوى ناسي
وواصله معاه للآخر
خلاص خلصت .. خلاص خلصت
ثناء شلش
رضا يونس
ياللي تحب الجمال
أصل الجمال جوا
لا تدور ع اللي مال
خد فرصه واتروا
الزينه مش ف المال
ولا ملامح الحوا
الزينه راحة البال
وسجده ف الخلوه
رضا يونس
حديقة فريال
لما القمر اتسرق
مين اللي نور لي
طريق بدونه غرق
والعمر ما بقاش لي
أجمل كلام اتقال
واتغني ك الموال
قمرك ماهوش مسروق
دا حلاوه الصوره
قدامنا مبهوره
يا جماله ف التصوير
شيماء عادل
منى الشوربجي
لما كان ابويا عايش
كان مكانه جنبها
كان ياخدنى ف قلب ايده
ويورينى ضلها
كان ف مرة بيلاعبنى
فيها صلح وقتها
واستغماية وحبال
وانا استخبى ف قلبها
لما جت امى ونادت
كنا نهرب وقتها
انا وابويا
كنا حكاية
امى بتدور علينا
وهى هادية بصمتها
سرنا كان سرها
شوق وضلة نخلها
كنا دايما نجرى فيها
كنا حابين حبها
لما تيجى امى لينا
ونبقى ف زيارة لها
وف زيارتها ديا ياما
ياما قعدت جنبها
ويا صبر كتير وياما
يالا فينكم يالا نرجع
شمس العيون
طبعتكوا شامة
هى دية ذكرياتى
تبقى دى تفاصيل حياتى
ويا ارضى باعتبرها
هى عمرى كل ذاتى
ولما شد العود كبرت
خدنى ابويا معاه وصرت
ويا ابويا كان ولادى
وتقولولى نهدها
وكل ركن كتيربيحكى
قصة كانت منها
ليه بسرقة ذكرياتنا
جيتوا لحد عندها
السيد زكريا
يا أكتر حد كدبني
وأكتر حد حبيته
وأكتر حد
كنت ب اسيبه يغلبني
وبيسيبني
وأنا المفروض أكون بيته
…..
وخبيته ف حكاوي عيوني
وقت ماتتفتح سيرته
وبرجلني
وحير فكري وظنوني
ورغم الحيرة فسرته
لأنه ف روحه دوبني
وأنا اللي ف قلبي ربيته
…..
وكام مجذوب على بابه
ولا بيفتحش
وكان القرب أولى به
ف ليل ما يروحش
ووقت الوقت ما يعدي
أعيد الوعد
مليون وعد
يجيني الموج بصوت مدي
وأنا ف البحر صبيته
….
لا خمر العمر توهني
ولا أسكرني غير طبعه
يا أكتر حد يشبهني
وتشبه دنيتي ربعه
على باب الرحيل
دايرين
ودار بيا الزمان دورة
أعاد تدوري بين شقين
واحدهم باكي
والتاني
مواني الدمع حالفة يمين
تدوب وياه ف ترحاله
وتطرح فرحة ف رحاله
ملاك يملاه بخير غيطه
واحد وحده
وغاب طول
ما كانش البعد دا قليل
ولا كان الفراق بالسهل
ومهما أداري وأميل
ب أكون له ف المهالك سهل
وأبلسم روحي لجروحه
ولا أسمع مرة من نوحه
سفينة نوحك الواثق ف عطف الله
يناجي ف كل موج مولاه
بكل زوجين عليها اتنين
بدأ تاني الحياة بحياة
وأنا والله من غيرك
رسول ضلت رسالته وتاه
….
يا أكتر حد باتنفس هواه بهدوء
وأكتر من كتير جداااا
رموني للغرق قربان
وأنا وعيوني نرمي لك
حياتنا
تكون سفينة وطوق
وكفنت الجراح بالشوق
وكنت لمركبك مرسى
وريح وشراع
فكيف وإزاي أروح وأنسى
وأصاحب بر ..
بر وداع
وصدق النية حسيته
وحنيت القليب ب وصال
خلاص ف النبض رسيته
وعينت النسيم مرسال
عشان ينقل لي أخبارك
وأعيش بالحب دا جارك
وأغني ف ضحتك موال
…
يا أكتر حد
خوفني بجفاه ف البعد
وأكتر حد قدر معنى كلمة صد
وأكتر م الفراغ ف الوحدة
متحدة الشروخ ف القلب
ولا كان المرار ف الكاس
ولا كان المرار ف الغلب
مراره ف غربة كات فينا
بيطرح زهرها ف القرب
ورغم الزحمة دي
وحدي وبإديه
ب أشم الوحدة جنية
تاخدني لبرد تحت الأرض
وأنا اللي ب أقيم صلاة وصلك
وصنت الذكرى سنة وفرض
….
يا أكتر حد مابيفهمش أوجاعي
وما بيديش مساحة لروحي تشرح له
على الهايفة يغيب عني
ويجرحني بدون داعي
وب أفتح له
ف مواني الأمنيات ميت شط
وكالمشرط
ينسل مني أفراحي
ويفتح فرجة لجراحي
يطير فوق السما بريشي
مفيش مرة ف قليبي يحط
أبيع إزاي وأنا الشاري
وتحت الشاري مليون خط
ولو يسمع لأوتاري
هيرجع دون كلام أو شرط
….
السيد زكريا
عصفورة بقلم منصور عبد المقصود
عصفورة
عصفورة وقفت ع الشجر
ينعق غراب البين
تبكى الفراخ الحيرانين
على عش داق
من قسوة الصياد
نزف السلاح الألم
وقفتله بالمرصاد
قومى إهربى يا جنة العصافير
من طلقة عامية متصيدش فى الغربان
تعبان
بيزحف على غصن يابس
لكنه حاميكى
من كتر قهر الزمن
يحلى الغنى فيكى
كل اللى كان يوجعك
شماتة الغربان
عصفورة قومى
متسمحيش لجبان
انه يشد الغطا
على جسمك الناحل
ومتسمحيش للبكا
انه يهز العين
قومى اصرخى
فى وش كل لعين
يا مفرقين الأسى
على ضل عشتنا
مستكترين الشوك
مع انه بيغيتنا
من كل سهم وصاب
سبب فى فرقتنا
يا زقزقة فى الحلق
ليه طالعة مكبوتة
ويا مر ليه حنضلك
طاغى على التوتة
منصور عبد المقصود
وناديتك حتى فى احلامى…عصام ادوارد
وناديتك حتى فى احلامى
اشتاقلك بتدوب اوهامى
واكتبلك بتدوب اقلامى
وناديتك حتى فى احلامى
حبيتك من غير مااشوفك
لو يوم اتملى من طيفك
او يوم حتى اسمع صوتك
وبحبى راح يبعد خوفك
وبحبك راح اعيش ايامى
وناديتك حتى فى احلامى
شفتك بالفرحه مضويه
والنسمه حواليكى تهفهف
والنجمه فى سماكى تنور
وفى سيرتك راح يحلى كلامى
وناديتك حتى فى احلامى
بتحبى بقلبك وعنيكى
وانا قلبى مشغول بعنيكى
وجناحه يرفرف حواليكى
ياحبيبتى ماتردى سلامى
وناديتك حتى فى احلامى
عشتك جوه خيالى حبيبه
وعملتك قصة حب عجيبه
نفسى فى يوم اشوفك جنبى
تملى صحوتى ومنامى
حبيتك حتى فى احلامى
القمر بهتان بقلم شيماء عادل
برسم بضيك صوره للماضي
العمر عدي ليل والقمر بهتان
والدمع ينزل م العيون راضي
صرخ الحجر
القلب مات عطشان
رسموه ك ورده مزهزهة
مرسومه ع الجدران
مر الزمان
ضيع ملامح سنها النسيان
عجوز
تهته ف نص الكلام
لم السنين حواديت
رسَب ف حلقه الوجع
كر السنين ك الخيط
عجوز
جمعت سنين عمرها
حبات حمام طاير
ما لقيتش غير ضلها
حيران حزين حاير
خَطَفت نجم الليل
وحضنته جوايا
لجل يواسيني
ف وحدتي
النجم زاد ف القسا
وما كانش ليا الونس
عتابي ليه كان زاد
والزاد انا ما دقتوش
والعمر بعده صدا
وقابلت ناس بوشوش
سحبت منهم بالوجع
وانا راسمه ١٠٠ ضحكه
لو قلبي قايد نار
يظهر لهم فرحه
عجزت انا بالوهم
والكل صدقهم
قلبي الصبي
بقى كهل
رافض يزور بابهم
عمر الوجع شايب
والشيب ماهوش بالسن
ول رسمة الماضي
كل القلوب بتحن
برسم انا بكفي
عصفور لقلبي احن
شيماء عادل فتات الشمس
شيماء عادل
بسرق فتات الشمس
بسرق فتات الشمس
واعيش على نورها
اسرح بيها ف المواويل
ايه اللي هيجرا
لو زورنا حتى الضحكه
اعتبروها ضحكة مساطيل
احفر جوه قلوبهم كدبه
ياخدوك بالحضن المهابيل
طبطب نافق
خليك اراجوز
ارقص ع الحبل وريهم
عرفهم انك مبسوط
هيحبوك
ويقابلوك
بالاحضان
عمر الستر ما كان بحيطان
اضحك وريهم الاعيبك
شخلل جيبك
مش هيشوفو يا عمنا عيبك
شايف الضي
اضحك
خرج كلمة آي
وكأنك فرحان مسرور
اراجوز
بتبيع الفرح لكل الناس
و الضحكه بتلمع ف عيونك
بضحك كل الخلق عليك
وتداري أحزانك وهمومك
اراجوز
بتلف بلاد الله عطشان
والكل بيشرب من ايدك
وبترضي تضحك كل الناس
والهم معنكب ف وريدك
وتدور وتلف وعلى كيفك
راضي ومغرور
و نهايتك هتكون ف الاخر
اراجوز مأجور
بتوافق تبقى الاضحوكة لكل المهابيل
وانا راضي اتباع
والسجن المسجون جوايا
مليان اوجاع
اهرب ورينا الضحكايه
من جوه السور
افرش برمالك جواها
وسع للشمس
خليها تطهر حواليها
دي مسيرها تغور
وتلاقي الضحكه
الكدابه
ماتت ف النور
مشاركتي في يوم العامية: دوارة شقا..
بقلم زينب عبد الكريم التميمي
في سكة وسط الضنا
نايم ع الرصيف تعبان
سمعت صوت رنته
والعزف كان الحان
كروان بلون السما
بيدق ع البيبان
العقل فيه استوى
سرحت فيه حيران
صوته فرايش دفا
تدفي ليل بردان
حط عكتفي وقال
باين عليك ولهان
فاضح فلعين كلامك
الصمت فيها بان
أبيض يادمع العين
إسود ياحزن البال
إحكي إفرج دمعتك
لحالي منك حال
بصيت بنظرة عجب
سألت بستهجان
عجبي عليك يازمن
الكل فيك.حيران
طاير فارد جناحك
وتقول انا التعبان
رد بلطافةْ بَحِتُه
وباعذب الالحان
تقيل ياحمل الروح
كسير ياغصن البان
قلم رصاص بقلم على البحيري
متقولى إيه السبب
ياابوسن انتيكه
إيه يعنى لابس عمامه
جواها استيكه
تكتب وتشطب براحتك
والحجه تفليكه
حاسب لاسنك ضعيف
والحاله شيكا بيكا
راح يجى يوم تنكسر
من كلمه تلكيكه
ولاراح يفيدك ندم
ولا غنوه ع السيكا
وبلاش اقولك كمان
حينعكشوا قبرك
والحجه إنك رصاص
فى الأصل يا ويكا
وأرجع وأقولك نصيحه
من قلم صاحبك
إياك يغرك حروفك
وتأسى على صاحبك
تكتب وترسم حكاوى
علشان هوى صاحبك
حيكون ساعتها الألم
طالك وطال صاحبك
بعد ما بدل حروفك
والحبر صار صاحبك
لا شطب ينفع معاه
ولا استيكات صاحبك
‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘
متقولي إيه السبب
نازل كتابه ورص
ولا حد ليك إنتبه
ولا الكلام ينحس
كل إللى همك تشخبط
بان النفاق. و اتحس
فاكر زمان لما كان
سنك صغير كدا نص
وكان مناك يبقى عندك
سنون كبيرة وبس
وكنت توعد و تحلف
ع الحق لازم أحس
واكتب حروفي و لون
علِم وكلام فيه نص
تلحس وعودك وتركب
تيار وموجة هجص
ياخسارة ضاع الأمل
وقطع لسانه مقص
مع تحيات جريدة على باب مصر
التعليقات مغلقة.