القصد ياإنسان بقلم الفلاح الفصيح معوض حلمي
للنشر في العدد الورقي
الدنيا صبح وليل
دايرين كما الرهوان
وانا خدت صاحبي دليل
فأخدني للتوهان
وانت ف محلك سر
زايـد سكـاتك مـر
واقف مابتخطيش
م الزن في ودانك
بتحاوطك الخفافيش
ملبوخ بأحزانك
حرموك تقول مبسوط
وتدوق حلاوة التوت
خايف من حكاوي الحوت
زرع الغيطان
لو ماشافش صاحبه يموت
وصاحب الملكوت عطاك الصك
إنسان مكـرم تطفي نار الشك
مايحك جلدك غير أصابعينك
صاحبك تأمنه راح يصيب عينك
فازرع في تينك واوعى تزرع شوك
مهما الأبالسة حاشوك وقصفوا القلم
عافر ويا حلمك وهد الصنم
أصعب ألم إنك يموت إحساسك
والحس دافع للحياه والخير
هاتطير وترفع في الفضا راسك
هاتعيش في ناسك وانت زي أمير
هاتبوس بفاسك خد خد الأرض
تطرح خضارها صحبتين م الورد
والفرض فرضك لما يتوضاك
تزرع في ودك تجمعه حنه
تزرع في غلك تحصده أشواك
عايز أقول لك حكمتي واياك
تنساها أبدا هى هاتسرك
السر سرك وانت مفتاحه
والفجر طل بأمر فتاحه
باعت خيوط النور وطارد الضلمه
فإياك ضلامك يطفي أنوارك
فتش جيوبك فيها حلمك حق
صلح عيوبك تلقى قلبك دق
وإن دق قلبك صحى حلمك فيك
وسرجك على حصانك
فاعدل ميزانك
دا السكه بالنيات
ياتروح لأحزانك
يالفرح يملى عنيك
والزرع زرع إيديك
ماتلومش ع السجان
القصد ياإنسان
فعلك وراجع ليك
القصد ياإنساااااااااااااااااااااان
فعــــــــلك وراجـــــــــع ليــك
ـــــــــــــــــــــــــــــــــــــــــــــــــــــ
التعليقات مغلقة.