القلم والألم شعر أحمد كريم
آدي الورق وادي القلم
إكتب..وسيبَك م الألم
إكتب حروف..إكتب كلام
إرسم صور..إرسم حاجات
م الذكريات
إفتكِر كل اللى فات
ولّا اقول لك
بلاش تقَلِّب فى اللى فات
كل ماضى هوه ماضى
ماضى أصبح ذكريات
اللى فات راح وانتهى
وانت عايش جُوَّه يومَك
فى انتظار…المُنتَهَى
إكتب حروف متبَعتَره
وسيبها إوعَى تلِمَّها
واقعد تَخَيَّل لو الحروف اتجمَّعِت
هاتقول لك إيه؟
يمكن تطبطب عليك ويمكن
يمكن كلامها ينفَعَك
أو يوجَعَك
وفي الحالتين
حَرَّكت جوّاك الحياه
ومفيش آلام..راح تمنعَك
التعليقات مغلقة.