الكداب …
رضا أبو شنب
(الكداب)
قالوا الكدب ملوش رجلين
والكداب بيروح علي فين
كان بيحب يصدق نفسه
عامل زي غراب البين
الكداب بيغالط نفسه
دايما يبقي معاه وشين
وش يشيله ووش يحطه
و بيترقص علي الجانبين
لما تشوفه تحب تصاحبه
علشان عامل فيها امين
بيبيع اهله ويبيع صاحبه
ويبيع حتي صلاح الدين
لما لسانه بيفضل ساحبه
ينزل بينا في قلب كمين
يعمل ان الكل مصاحبه
لما نقوله خلاص عارفين
لما بيكدب كنا نساَمحه
وبنديله الفرصة اتنين
كان بيغير لينا ملامحة
حتي الكدب في لون العين
غير حتي هدومه ورسمه
غير اسمه وبقي من الصين
كان بيغير حتي في لحمه
واحنا بنعمل مش فاهمين
مهما هيكدب ربك فاضحة
اصل الكدب ملوش رجلين
عمر الكدب ما ينفع صاحبه
والكداب في النار عارفين
عمر الكدب ما ينفع صاحبه
والكداب في النار عارفين
التعليقات مغلقة.