الكلمه…بقلم الشاعر إبراهيم عاشور
كلمه تطبطب كلمه تواسى
كلمه بتدبح زى السيف.
كلمه بتعرف امتى بتطلع
كلمه بتحدف حسب الكيف.
كلمه امينه… وقار وسكينه
كلمه تجيب الوان الطيف.
كلمه بتفتح باب الرحمه
كلمه تجيب الشتا فى الصيف
حاذر ياابنى ولم كلامك
واكرم حرفك زى الضيف.
قد ماتقدر لم حروفك
تتبعزق منك فى الزيف.
نقى الكلمه وصفى النيه
تخلق جو جميل ولطيف.
وعن الحق إياك تتزحزح
تلقى كتابك سطره نضيف
واوعى الكلمه ف ايدك تفرط
وإياك تشهد كلمة زور
عارفك واعى وعارف ربك
عمرك ماتخطى ف محظور.
شد رحالك. حرفك. حالك
واطلع بيه لطريق النور.
تلقى الكلمه الزين سداده…
وان كات مره تعود مجبور.
ممكن كلمه وجيبك فاضى
تجبر أى جناح مكسور.
خدها نصيحه لأب اتمرمط
تطلع من دنياك منصور.
التعليقات مغلقة.