الكلمه رسول … معوض حلمي
……….. الكلمه رسول ………..
لسانا بنغزل بحروفنا ،
شعر السنيوره حرير
لسانا بنرسم طيفها ،
ولا أجمل بنت بتظهر ف التصاوير
لسانا بنجري ورا التفاح ،
لساه بيزغلل في عينينا
وشيطان الغي مالينا ،
خلانا كما المغاوير ….
لسانا بنكتب عن ضحكتها ،
وبنشكي إن الهوى غلاب
لسانا بنوصف مشيتها ،
وهى بتتمايل زي اللبلاب
ونسينا إن اللقمة المحبوسه
في بطن الغول
عارفه إن الكلمه رسول ،
وهاتفتح ليها الآبواب …
فخلي مدادك نبضه خشوع ،
إوعاك م الضلمه تغمي عينيك
دا البطن إذا صابها الجوع ،
عصافيرها هاتدعي عليك
والكلمه دي حد وفاصل ،
بين الغي وبين الدين
وملايكة ربك شاهدين ،
على فعل إيديك …
فخلي الكلمه مشاعل نور
على طول تهدي التايهين
وافتح بيها بيبان الدور
المقفوله وخايفه بقالها سنين
خلي البرد يروح م الروح
ويفوح الدفا إحساس
دا الكلمه تداوي جروح الناس
وتزرع حواليها اليقطين …
………………………………..
بقلمي الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.