اللمة الحلوة بقلم / هالة على أبو الذهب
وحشتني اللمة في بيتنا
والضحكة اللي من القلب
وحشتني السهرة الحلوة
على فيلم وقرطاس لب
وحشوني امي وابويا
والطيب قلب اخويا
وحشتني الدنيا بحالها
ودعوة قولي يا رب
لما اشكي يقولها الحاج
لو شاف الدمع في عيني
او يعتب بينه وبيني
وست الكل حبيبتي
ومنابي اللي عيناه
ان يوم طالت غيبتي
اخره ارجع القاه
وحشتني سنين عمري
والرسم ع الحيطان
والنقش اللي باسمي
على باب الجيران
والهوى اللي رمى شِبَاكُه
للقلب فتح شِبَّاكه
لنسمة شوق تعدي
وصحبة ورد مندي
من قلب وحيد حيران
وحشتني اللمة الحلوة
ووحشني عمري زمان
التعليقات مغلقة.