الليل بقلم خن ـ أنوب الجديد معوض حلمي منشأة بطاش تمي الأمديد دقهلية

الليل بقلم خن ـ أنوب الجديد معوض حلمي منشأة بطاش تمي الأمديد دقهلية

الليل ده غريب مالهوش كتالوج
ولا ليه تفاصيل ، ولا ليه عنوان
بيصدق أي كلام ، بيروح كتاب الشيخ ، وبيتبع أي شيطان
الليل سجان
بيخاصم كل نجوم السما
والقمر العالي مابيحبوش
وبيغرز ناب الضلمة في قلب البنت السهرانه مابيهموش
الليل مرعوش
مابحينش أبدا أبداً ع المجاريح
ولا مد إيديه ويطبطب ع العشاق
ولا بيرحم أي رموش
الليل دا فاشوش
بيذيع الأسرار
الليل درويش هايجي معاك الجامع وهايسكر وياك في البار
الليل مدمن أوزار
بيشفي في لحم البنت ف حفلة زار
ويدب الواد قلمين على وشه هزار ف هزار
وبيسرق أشعار الحب واشعار الحزن من عمي نزار
الليل مهزار ، مالهوش في الصاحب أي شروط
بيعور وشه بمشرط ويبان مجنون ولومنجي
وبيعوج طرف لسانه لو يقعد ويا حلنجي
وساعات بيكون نسوانجي
الليل مزاجنجي
وبيرسم ع التحويشه
لو بان في عينيك فنان ومسك ف إيديه الألوان والريشه
ف الأخر بيطلع كداب ملعون وكئيب
لو قالك نسهر سوا ع القهوه ونضرب حجرين شيشه
هايسيبك فجأه ويخلع ، وتحاسب ع المشاريب
الليل كسيب
بيفنط ورق الكوتشينه
وبيقـرص زهر الطـاوله
ويكش الملك الواقف جنب وزيره الهليب
الليل دا رهيب
عامل شكل الديب المسعور ، وبيدعوا المخاليق للطيش
بيخاوي عيال الغرزة الصيع وبياخد منهم بقشيش
بيخلص كل الصبر النايم في عينين الحاره ، وبينتف حتى جناح الروح م الريش
الليل ماراويش
ولابيطفي النار القايده في سجر التوت الطارح نور
ولا ساب الساقيه تدور
ولاساب الشارع زي زمان مستور
الليل مجبور
بيكون للعايز باب مالهوش مفتاح
وبيفرد ستره وبيداري الحسنه وبيستر برضه السفاح
الليل نواح
مغلوب على أمره مش قادر يفتح أي بيبان لخيوط الفجر
ولاعارف إن ستارة الضلمه المفروده على قلوب الخلق مليانه بغدر
الليل ندر
على كتاف الواد المتوضي وناوي يصلي الفرض حضور
على بال الواد الصاحي وبيخطط يهتك عرض الدور
بيبيع الأحلام لبنات الغي ، وبنات النور
الليل دستور ..؟
ـــــــــــــــــــــــــــــــــــــــــــــــــــــــــــــــ