“المحاكمة ” شعر وحيد علي الجمال

قدميني للمحاكمة
تُهمتي طول السكات
وإني داخل في الملاكمة
بعد عمري ما كله فات
القصايد كلها
نَظّمَها عَجِّز وشاب
مش هتستحمل مناهده
انت مش زي الشباب
خلي بالك هي شِدة
القوافي والبحور
راح تِصَرَّخ م الكلاب
واعترافك بالجنان
هو أسهل ألف مرة
قبل ما تروح الليمان
اجري يالا
خبي نفسك ف الديوان
واحلف أن الطبع غلطة
مش تمام
هرطقه وخزعبلات
انت قلبك كله عامر
بالإيمان
الوطن هو الحقيقة
كل حاجه عكسها
كفر واضح بالإمام
اوزنيني بالكلام
اكتبيني كام جرام
احدفيني م الشمال
وارزعيني في اليمين
شِد نفسك في الطابور
القانون معروف وثابت
في المرور
حرف شِعرك ضد شرعك
يبقي شِعرك شيء حرام
اوعى مرة تقول وتشكي
أو تفضفض وانت مش قادر
وتبكي
انت مأمور وقت دبحك
من سُكات سلم رقبتك
وانت راضي تقول تمام
هو دا شرع الأمير
لسه خيلك ممنوعين
خوض السباق
والسبايا والكرام
في النخاسة معروضين
لما شوفتك في الهوامش
رحت شايل فوق مداسك
كف طين
بح صوتي بالكلام
كنت بحلم ابقى شاعر
عمره مايخاف الملام
او يحطوا فوق لسانه
طوق لجام
اكتب الشعر في عينيكي
والعن الغيرة في هواكي
واوصف الحب ف سماكي
كله بعدي يقول آمين
مش هصدق إني ممكن
حلمي فيكي يكون حرام
غصب عني
ابقى هادي ومستكين