المسامح كريم و لكن
بـ قلم أسـمـاء الـبـيـطـار
يمكن مش عارفة ابدأ منين خصوصًا إننا في الشهر الكريم ، و كريم حقيقي في كل حاجة ، في العطاء ، و الكرم ، و الجود ، و طبعاً في حدود إمكانيات كل واحد فينا .
لكن عند النفس و ما فيها و هنقف شوية معاها .
و زي ما إتكلمنا عن اللي يقدر يسامح ، فلازم نتكلم عن اللي ما يقدرش يسامح ، لإن دا إنسان و دا إنسان .
و أكيد كل واحد ليه ظروفه اللى أكيد لازم نقدرها .
ديماً نسمع كلمة
خلاص بقى .. إنسى ، المسامح كريم ، ما يبقاش قلبك أسود
أنتِ قاسي قوي ، ربنا مش هيسامحك ، و كلام كتير من ده .
و تقريباً الشخص اللي بيسمعه و المعنى بالكلام و لا هو هنا ، مش سامع ، و لا عاوز يسمع منهم حاجة .
مش علشان هو وحش أو قاسي أو غبي .
لكن للأسف هما مش مقدرين إنه بني آدم ، ليه قدرة و طاقة .
مش مدركين كمية الضغط اللي إتحملها .
كمية الضغط النفسي و العصبي اللي إتعرض ليها لما سامح مرة و اتنين و تلاته و يمكن ما كنش بيبقى غلطان .
لما جه على نفسه كتير و ما حدش طيب خاطره بكلمة .
لما بقي يسكت و يبعد شوية بشوية .
لما بقي يبطل عتاب .
لما بقي قلبه يقفل شوية بشوية من ناحية كل حاجة .
و يمكن حضرتك و غيرك شايف حاله ووضعه و سايبه !
فحرام نييجي عليه أكتر و أكتر و في فترة شهر عوزينه ينسى اللي إتعرض ليه في سنة كاملة و يمكن أزيد !
حرام تبقى قاسي و تتهمه بسواد القلب ، رغم إنه يمكن يكون أطيب خلق الله .
حرام إنك ما تبقاش مقدر إنه إنسان زي اللي عوزه ييجي على نفسه علشان خاطره !
صحيح المسامح كريم ..
لكن اللي يقدر يسامح بنفس راضية تمام الرضى .
و إلا هيبقى نفاق و بدل ما يكون مش قادر يسامح واحد .
ممكن يبقوا اتنين و تلاته لإنهم ضغطوا عليه بزيادة و مقدورش إنه إنسان .
و مش هقولك ما تعملش اللي عليك و تحاول تراضي و توفق
لكن .. لابد أن نحترم ذات الشخص و نفسه و ما تحمل .
فبلاش نكون عبء زيادة على قلوب ربكم أعلم بها .
التعليقات مغلقة.