المعنى فى بطن الشاعر بقلم / فهمي فوزي البطران
فى ناس ضيعت فى الوقت
وعدى العمر بلا فايده
وناس تانيه بتكتب شعر
ونفس النسبه هناك عايده
ياناس قايده
على شموع القصور وقاعات
بتقروا الشعر بتلاقوا صريخ واهات
وناس تنشاط
وناس بتبات على مجد وامل زايف
تعيش خايف
من الامنجى ليقول
وتتدارى ف مجاز اهبل
عشان كلمه تجيب مسئول
صباحك فول
يا متغمس ومتعبى فى كيس مقفول
هناك فى غول
بيلخبط
وبيشخبط
كلام ممكن يجمل صوره من صورك
تعيش تكتب وياخدوا من سنين عمرك
على الفاضى
تعدل فكره مش ليهم
وتملا كل اوانيهم
وتتكلم تناديهم
كلامك صوت صدى راجع
معبى حرقه ومواجع
ويسكن الكلام تانى ف حضن البير
ويتكوم لحد الحلق من بره
وتطفح كل كلماتك
كتل جمره
دا رحمه من صفات ربك
يكون فى قيئ
يا وجع العمر يا مدينتى
قوليلى أنتى فين أنتى
وماشيه أزاى
بضيع غلبى فى سيجاره
وحبه شاى
قوليلى مين اللى جاى فينا وبعدينا
طاحونه بتطحن الكلمه تغدينا
حياه الشعراء مليانه
جبال كلمات
فقيره الكلمه فى بلدى
بجوز جنيهات
بلح ابريمى..بلح طايب..بلح امهات
ياناس قولولنا من الآخر
نقضيها معاكوا سكات
ونكتم كل اوجعنا
ونمنع حد يسمعنا
ونطفش منكوا ونهاجر
لناس
تانين
ولاده شكلها منبوذ
خلق دايما بتضرب بوز
دى ناس محتاجه تتعالج
دواهم
يشربوا بالكوز
تعيش أراجوز
هتتحمل تعيش أراجوز
بلاد المعنى والمغنى
بتضرب اللى جاى بالجوز
بتحرن
ع اللى بيفكر
بتقتل ميت حصان وأكتر
تعوزه وقت ما تفكر
يقف ألاووظ
هنااااااك محظوظ
وأنا مرمى فى مكتبتى كتاب محفوظ
تراب العمر عدى عليه
تعالوا حتى بصوا عليه
أقول إيه تانى
والكعبه
لأقول أحيييييبه
التعليقات مغلقة.