الموت حقيقة… بقلم رضا أبوالغيط
الموت حقيقة
الموت حقيقة
والحقايق موت
والواد مفكر
انه مش هيموت
عايش يطوح الأمل ف الريح
ويداوي حلمه لما يبقى جريح
وفاكرها ماشية
والخطاوي تفوت
واقف بيلضم بكرة ف امبارح
وضلع النهر ف المالح
ومش فالح ف علو الصوت
ولا عارف يكون مبسوط
ساعات بيلم أوجاعه ف بؤجة خيش
وساعة يسد صوت بطنه بلقمة عيش
وساعة ينام ع الترعة ف حضن التوت
ويخده الحلم من ايده لدنيا براح
ونور أفراح
ومال بيحط فوق حجره
بدون ما يقوله أي شروط
وشوط بيفوت
وبعد الشوط
يعود من تاني للدنيا ضعيف مكبوت
بيسند ظهره ع الأيام
وأيامه ف ايدها تابوت
على ضلعه اللي داب مكتوب
الموت حقيقة
والحقايق موت
رضا أبوالغيط
التعليقات مغلقة.