الناس الطيبين …أغنية شعبية بقلم الشاعر أشرف يوسف
الناس الطيبين
لقلوبنا قريبين
وسيرتهم أحلي غنوه
لكل المعجبين
دايما بنحس بيهم
وكمان بنخاف عليهم
وان غابوا عن عنينا
في قلوبنا موجودين
ولا تحلا الدنيا إلا
بالناس الطيبين
الناس الطيبين
مايحبوش الخصام
وان قولت سلام يقولوا
وعليكم السلام
والخير اللي ف إيديهم
مش ممكن يبقي ليهم
دايما عايشين لغيرهم
واحلف مليون يمين
ولا تحلا الدنيا إلا
بالناس الطيبين
الناس الطيبين
بتحب ومش بتكره
والخير بيقدموه
علشان يلاقوه في بكره
في الشده بنلاقيهم
دايما مادين إيديهم
والضحكه اللي ف قلوبهم
بتنور عالجبين
ولا تحلا الدنيا إلا
بالناس الطيبين
الأحد بتاريخ ٢٠٢٣/٢/١٩م
التعليقات مغلقة.