الناس للناس بقلم شاعر الغلابة سامح هريدي

الناس للناس
البيت أصلاً من غير ترباس
فَ يدوبك تقدر تتنحنح
وياساتر
وبقلبك تدخل
تقعد وتربع جوا الروح
مطرح ما تروح
بتلاقي قلوب مفتوحة بحب
ولا تعرف غِل
ولا كُره وحِقد
وبكل الخير الايد تتمد
وإن حتي ان كان الحال ع القد
بتلاقي الجود
والكرم الزايد فوق الحد
وتلاقي الجمعة ويوم الأحد
عايشين مع بعض ف بيت واحد
كلمة جاحد
مكنتش بتظهر فى المشهد
والطبق الداير بين الكل
عمال بيلف ومتعبشي
وواقف يشهد
ويأكد دايماً ع المعروف
م أهو صعب تشوف
الجار بيجور يوم على جاره
ده البير وغطاه
وأخوه الكاتم أسراره
كان ليها كبير
وأصول مش ممكن
حد فى يوم يتعدّاها
الضحكة تملي بتلقاها
فى وشوش الكل
(ف صباح الخير يا اللى معانا)
ياصباح الرزق
وصباح الفل على الشجرة
الحاضنه قلوبنا وأسامينا
من حبة ملح بيتراشوا
على صوت بالفاتحة بيرقينا
على قعدة جدي على الدكة
ووجود عكازه اللى حامينا
على كل نصيحة من الغالي
من قلب المحنة تعدينا
علي ساعة المغرب فى الحارة
بعد ما رشوها بمياة ورد
على كل طريق مفروش بالود
على أطيب ناس
رأس مالهم فى الدنيا الإخلاص
على كل الصور اللى ف أيدي
والذكري اللى أنا كنت أتمني
إنها تفضل وتعيش وتدوم
على بكرة الدايب فى إمبارح
من بعد ما شاف اليوم مهموم